सचिवालय र मन्त्रिपरिषद् बैठक बस्दै, प्रदेश प्रमुखको नियुक्ति मुख्य एजेण्डा

काठमाडौं- नयाँ प्रदेश प्रमुख नियुक्तिको विषयमा निर्णय लिन आज (साेमबार) मन्त्रिपरिषद्को बैठक बस्दै छ । 

हिजो (आइतार) सातै प्रदेशका प्रदेश प्रमुखहरुलाई पदबाट बर्खास्त गरेसँगै आज नयाँ नियुक्तिका लागि मन्त्रिपरिषद्को बैठक बस्न लागेको हो । 

हिजो नै नयाँ प्रदेश प्रमुख नियुक्त गर्ने तयारी गरिए पनि सत्तारुढ पार्टी भित्रै आन्तरिक सहमति हुन नसकेकाले बैठक स्थगित भएको थियो । स्थगित बैठक आज मध्यान्हपछि बस्ने प्रधानमन्त्री केपीशर्मा ओलीका प्रेस संयोजक चेतन अधिकारीले जानकारी दिए ।
 
यस्तै मन्त्रिपरिषद्को बैठक अघि सत्तारुढ नेकपाको सचिवालय बैठक बस्दै छ । बिहान ११ बजेपछि प्रधानमन्त्री निवास बालुवाटारमा बस्ने बैठकमा प्रदेश प्रमुखहरुको छनोटका विषयमा सहमति खोजिने नेताहरुले बताएका छन् ।
 
हिजै नियुक्तिको तयारी गरिएपनि नेकपाभित्र सहमति हुन नसकेपछि आज सचिवालय बैठक बस्न लागेको हो । सचिवालय बैठकले नयाँ प्रदेश प्रमुखको नाममा सहमति गरेसँगै मन्त्रीपरिषद बैठक बसेर नियुक्तीको निर्णय गर्ने भएको छ ।
 
राष्ट्रपति विद्यादेवी भण्डारीले हिजो सरकारको सिफारिसमा सातै प्रदेशका प्रमुखलाई हटाएपछि पद रिक्त रहेको छ । प्रदेश प्रमुखमा अमिक शेरचन, अमृत बोहोरा, महेन्द्र पाण्डेलगायतका नेताहरुको नाम चर्चामा छ ।