काठमाडौं- सत्तारुढ नेपाल कम्युनिष्ट पार्टी नेकपाले आगामी उपनिर्वाचनका लागि प्रतिनिधिसभा र प्रदेशसभाका उम्मेदवारहरुको टुंगो लगाएको छ।
आइतबार बालुवाटारमा बसेको सचिवालय बैठकले उम्मेदवारहरुको टुंगो लगाएको हो।
बैठकले कास्की २ मा प्रतिनिधिसभा सदस्यका लागि विद्या भट्टराईलाई उम्मेदवार बनाउने निर्णय गरेको छ। भट्टराई दिवंगत मन्त्री एवम् सोही निर्वाचन क्षेत्रबाट निर्वाचित सांसद रवीन्द्र अधिकारीकी पत्नी हुन्।
त्यस्तै प्रदेश सभा सदस्यका लागि दाङ ३ (ख) मा विमला वलीलाई उम्मेदवार बनाउने निर्णय गरेको छ। वली सोही निर्वाचन क्षेत्रबाट निर्वाचित दिवंगत सांसद उत्तरकुमार वलीकी पत्नी हुन्।
त्यसैगरी भक्तपुर १ (क) मा देवीप्रसाद ढकाललाई उम्मेदवार बनाउने निर्णय नेकपाले गरेको छ।
नेकपाले बाग्लुङ २ ख मा भने राष्ट्रिय जनमोर्चाका उम्मेदवारलाई समर्थन गर्ने निर्णय गरेको छ।
त्यस्तै धरान उपमहानरपालिकाको मेयरमा प्रकाश राईलाई उम्मेदवार बनाउने निर्णय नेकपाले गरेको छ।
प्रकाशित: Dec 31, 2017| 18:23 आइतबार, पुस १६, २०७४