सुत्केरीको मृत्युपछि विराट नर्सिङहोम तनावग्रस्त

विराटनगर - सुत्केरीको मृत्युपछि विराटनगरस्थित विराट नर्सिङ होममा मृतकमा आफन्तले प्रदर्शन गरेका छन्। सुनसरी दुहरी नगरपालिका-८ रनी गाउँकी २० वर्षीया रमिला कार्की घिमिरेको मृत्यु भएपछि आफन्तले शुक्रबार बिहानैबाट प्रदर्शन गरेका छन्।

मंगलबार विराट मेडिकल कलेजमा छोरा जन्माएकी रमिलाको रक्तश्राव नरोकिएपछि उनको पाठेघर फालिएको थियो। रमिलाको होस नखुलेपछि बुधबार दिउँसो टिचिङ अस्पतालबाट विराट नर्सिङ होममा भर्ना गरिएकोमा उनको बिहीबार राति मृत्यु भएको थियो।

चिकित्सकको लापरबाहीका कारण रमिलाको ज्यान गएको आफन्तको आरोप छ। उनीहरुले शल्यक्रियामा लापरबाही गर्ने चिकित्सकलाई कारबाही र घटनाको छानबिन गर्न माग गरेका छन्।

नवजात शिशुकोसमेत मृत्यु भइसकेको छ।