काठमाडौं- मंगलबार बिहानदेखि देशभरको मौसममा सामान्य सुधार आएको छ। चार दिनको झरी पश्चात सोमबारबाट मौसममा केही सुधार आउन थालेकामा मंगलबार थप सुधार आएको हो।
मौसम पूर्वानुमान महाशाखाका अनुसार हाल हाल देशभर सामान्य बदली रही प्रदेश नम्बर १, गण्डकी प्रदेश, कर्णाली प्रदेश र सुदूरपश्चिम प्रदेशका केही स्थानमा हल्कादेखि मध्यम वर्षा भइरहेको छ।
नेपालको तराई भूभागमा केन्द्रित मनसुनको न्यूनचापीय रेखा दक्षिणतिर सरेसँगै नेपालमा मौसममा सुधार आएको हो। मंगलबार दिउँसो मुलुकका केही स्थानमा हल्कादेखि मध्यम वर्षाको सम्भावना छ। सुदूरपश्चिमका एक-दुई स्थानमा मेघ गर्जन,चट्याङसहित भारी वर्षाको सम्भावना रहेको महाशाखाले उल्लेख गरेको छ ।
मंगलबार राति बागमती प्रदेशका एक-दुई स्थानमा भारी वर्षाको सम्भावना रहेको छ। बुधबार देशभर सामान्य बदली रही केही स्थानमा हल्कादेखि मध्यम वर्षाको सम्भावना छ। राति प्रदेश १ का एक-दुई स्थानमा भारी वर्षा हुने देखिन्छ।