काठमाडौं- १८ वर्षीया किशोरी बलात्कार आरोपमा पक्राउ परेका विद्यार्थी नेता इन्द्रहाङ राईलाई बर्खास्त गरिएको छ ।
प्रहरी हिरासतमा रहेका नेकपा निकट अनेरास्ववियूका नेता तथा आरआर क्याम्पसका स्ववियू सहसचिव राईलाई स्ववियूले बर्खास्त गरेको हो ।
विज्ञप्ति जारी गर्दै स्ववियू सभापति तपेन्द्र शाहीले राईलाई बर्खास्त गरिएको जानकारी दिए । विज्ञप्तिमार्फत राईलाई आगामी दिनमा स्ववियूका कुनैपनि कार्यक्रममा सहभागि नगराइनेसमेत जानकारी दिइएको छ ।
किशोरीको बयान र उजुरीका आधारमा राईलाई महानगरीय प्रहरी वृत्त बौद्धले मंगलबार विहान पक्राउ गरेको थियो ।
पीडित किशोरीले सोमबार राति प्रहरीलाई सम्पर्क गरि राईले आफूलाई बलात्कार गरेको आरोप लगाएकी थिइन् । त्यसलगत्तै प्रहरीले किशोरीलाई उद्धार गरेको थियो । राईले काम छ भन्दै बोलाएर आफ्नै साथीको कोठामा लगेर बलात्कार गरेको किशोरीले बताएकी छन् ।
महानगरीय परिसर काठमाडौंका प्रवक्ता होविन्द्र बोगटीले घटनाबारे आरोपितलाई पक्राउ गरेर अनुसन्धान भइरहेको जनाएको छ ।
प्रकाशित: Dec 31, 2017| 18:23 आइतबार, पुस १६, २०७४