आलम पक्राउमा मेरो विरोध छैन : देउवा

काठमाडौं- नेपाली कांग्रेसका सभापति शेरबहादुर देउवाले कांग्रेस सांसद मोहम्मद आफताब आलम पक्राउबारे आफूले विरोध नगरेको दाबी गरेका छन्।

शनिबार एक विज्ञप्ती जारी गर्दै देउवाले आलम माथिको मुद्दामा कुनै पनि पूर्वाग्रह र दबाबमुक्त रहेर अनुसन्धान गर्ने कार्यलाई नेपाली कांग्रेसको सहयोग रहनेसमेत स्टपष् पारेका छन्।

शुक्रबार कांग्रेसको केन्द्रीय नीति, अनुसन्धान तथा प्रशिक्षण प्रतिष्ठानद्वारा भक्तपुरमा आयोजित प्रशिक्षण कार्यक्रमको उद्घाटन समारोहमा देउवाले आलम पक्राउ राजनीतिक प्रतिशोध भएको भन्दै विरोध गरेका थिए।

देउवाले जारी गरेको विज्ञप्तिमा भनिएको छ, ‘कुनै पनि गम्भीर मुद्दामा प्रकृयागत ढिलासुस्ती हुँदा त्यसले निर्दोष सावित हुने या दोषी ठहर हुने सत्यतथ्य अन्बेषण गर्ने कार्यमा बाधा पुग्छ नै। १२ बर्ष पुरानो मुद्दामा मैले यही संकेत गरेको हुँ।’

अस्पष्टता र अन्योल निवारणका लागि भन्दै जारी गरिएको विज्ञप्तिमा कानुनी राज्यमा विश्वास गर्ने नेपाली कांग्रेस कोहीमाथि पनि जरुरी अनुसन्धानको विपक्षमा उभिन नसक्नेसमेत उल्लेख गरिएको छ।

विज्ञप्तिमा निर्दोष कोही दण्डित नहुने र दोषीलाई उन्मुक्ति हुन नहुने आफूहरुको प्रष्ट मान्यता रहेको दाबी गरिएको छ।

यस्तो छ विज्ञप्ति

कार्तिक ०२, २०७६

प्रेस विज्ञप्ति

सबै अस्पष्टता र अन्यौल निवारणार्थ

नेपाली कांग्रेस केन्द्रीय नीति, अनुसन्धान तथा प्रशिक्षण प्रतिष्ठानद्वारा भक्तपुरमा आयोजित प्रशिक्षण कार्यक्रमको उद्घाटन समारोहमा व्यक्त धारणाले उत्पन्न गरेको केही अन्यौल र अस्पष्टता चिर्न यो विज्ञप्ति जारी गरेको छु ।

कुनै पनि गम्भीर मुद्दामा प्रकृयागत ढिलासुस्ती हुँदा त्यसले निर्दोष सावित हुने या दोषी ठहर हुने सत्यतथ्य अन्बेषण गर्ने कार्यमा बाधा पुग्छ नै । १२ बर्ष पुरानो मुद्दामा मैले यही संकेत गरेको हुँ । तर कानुनी राज्यमा विश्वास गर्ने नेपाली कांग्रेस कोहीमाथि पनि जरुरी अनुसन्धानको विपक्षमा उभिन सक्दैन । मोहम्मद आफताव आलम माथिको मुद्दामा कुनै पनि पूर्वाग्रह र दबाबमुक्त रहेर अनुसन्धान गर्ने कार्यलाई नेपाली कांग्रेसको सहयोग रहन्छ । निर्दोष कोही दण्डित नहुने र दोषीलाई उन्मुक्ति हुन नहुने हाम्रो प्रष्ट मान्यता म सार्वजनिक रुपले प्रष्ट्याउन चाहन्छु ।

जय नेपाल !

शेरबहादुर देउवा
सभापति