काठमाडौं–नेपाली राष्ट्रिय टोलीका लेग स्पिनर सन्दीप लामिछाने ईङल्याण्ड र वेल्समा हुने पहिलो संस्करणको ‘द हन्ड्रेड’मा खेल्ने पक्का भएको छ। बर्मिङ्घम फिनिक्सले एक लाख पाउण्डमा सन्दीपलाई अनुबन्ध गरेसँगै उनले ‘द हन्ड्रेड’ खेल्ने पक्का भएको हो। उनी पहिलो पटक सर्वाधिक मूल्यमा फ्रेन्चाइज क्रिकेट लिगमा अनुबन्धित भएका हुन्। ड्राफ्टमा अटाउने सन्दीप एक्लो नेपाली खेलाडी हुन्।
यससँगै उनी युएईमा हुने टी–१० मा पनि छनोट भएका छन्। यस सिजन उनी कर्नाटका टुसकेर्सबाट टी–१० क्रिकेट लिग खेल्ने भएका छन्। सन्दीपलाई कर्नाटकाले पहिलो चरणमा लिएको छ। विदेशी कोटामा अनुबन्धित भएका सन्दीपले ४५ हजार अमेरिकी डलर पाउने छन्। सन्दीपले गत सिजन केरला किङ्सबाट खेलेका थिए।
आगामी नोभेम्बर १५ देखि २४ सम्म आयोजना हुने टी–१० लिगमा ८ टिमले प्रतिस्पर्धा गर्ने छन्।
प्रकाशित: Dec 31, 2017| 18:23 आइतबार, पुस १६, २०७४