काठमाडौं- विस्फोटक पदार्थ र हतियारसहित नेत्रविक्रम चन्द विप्लव समुहका २१ जना कार्यकर्ता पक्राउ परेका छन् । पक्राउ पर्नेमा विप्लवका दाइसमेत छन् ।
नेपाल–भारत सीमानाकाअन्तर्गत दाङको राजपुर गाउँपालिका–४ मुग्रेटाखोलास्थित जङ्गलबाट उनीहरुलाई पक्राउ गरिएको जिल्ला प्रहरी कार्यालय दाङले जनाएको छ ।
त्यहाँ विप्लव समूहको बैठक भइरहेको प्राप्त गोप्य सूचनाका आधारमा पुगेको प्रहरीको टोलीले गएराति १ः०० बजे उनीहरुलाई पक्राउ गरिएको हो ।
पक्राउ पर्नेमा विप्लव समूहका मध्यपश्चिम कमाण्ड इन्चार्ज वीरजङ्ग चन्द, केन्द्रीय सदस्य तथा राप्ती ब्यूरो इन्चार्ज सुवास बाठा, युवा सङ्गठनका केन्द्रीय अध्यक्ष पाटनलगायतका नेता तथा कार्यकर्तालाई पक्राउ गरिएको हो । वीरजङ्ग चन्द ‘विप्लव’ का दाजु हुन् ।
दाङका प्रहरी प्रवक्ता डीएसपी विनोदविक्रम शाहका अनुसार पक्राउ परेका उनीहरुलाई जिल्ला सदरमुकाम ल्याइँएर अनुसन्धान थालेको छ ।
उनीहरुसँग कति हतियार र विस्फोटक पदार्थ थियो भन्ने प्रहरीले खुलाएको छैन् । अनुसन्धानपछि विस्तृत जानकारी गराइने डीएसपी शाहले जानकारी दिए ।
प्रकाशित: Dec 31, 2017| 18:23 आइतबार, पुस १६, २०७४