महरालाई पक्रन बाटो खुल्याे

काठमाडाै‌ - बलात्कार आरोपमा सभामुख पदबाट राजीनामा दिएका कृष्णबहादुर महरालाई पक्रन प्रहरीलाई बाटो खुलेको छ। 
आइतबार काठमाडौं जिल्ला अदालतका न्यायाधीश ब्रजेश प्याकुरेलको इजलासले महरालाई पक्राउ गरी अनुसन्धान गर्न अनुमति दिएपछि पक्राउ गर्न बाटो खुलेको हो।
नयाँ मुलुकी फौजदारी संहितामा कसैलाई पक्राउ गर्नुपूर्व अनिवार्य रूपमा अदालतको अनुमति लिनुपर्ने प्रावधान छ।


बलात्कारको प्रयास गरेको भन्दै रोशनी शाहीले शुक्रबार महराविरूद्ध प्रहरीमा उजुरी दिएकी थिइन्।  रोशनीले दर्ता गराएको सोही उजुरीका आधारमा महरालाई पक्राउ गर्ने अनुमति लिन प्रहरी अदालतमा गएको थियो।

यौन दुर्व्यवहार गरेको आरोप लागेपछि महराले सभामुख पदबाट राजीनामा दिएका थिए। जबरजस्ती करणीको प्रयास गरेको अभियोगमा शाहीले महानगरीय प्रहरी वृत्त, नयाँ बानेश्वरमा शुक्रबार जोहरी दिएकी हुन्। 
उनको जाहेरीसँग महरा पक्राउ पर्न सक्ने संकेत प्रहरीले गरेको छ। यसअघि १३ असोजमा पीडित महिलाले आफूमाथि महराले जबरजस्ती करणी गर्ने प्रयास गरेको दाबी गरेकी थिइन्। गत आइतबार राति पौने ९ बजे तीनकुनेमा भएको भनिएको घटनापछि प्रहरीसमेत उनको घरमा पुगेको थियो।

शाहीले आफू महराबाट पीडित भएको भिडियो सार्वजनिक भएसँगै महरालाई पदबाट राजीनामाको लागि पार्टी नेतृत्वले समेत दबाब दिएको थियो । महराको राजीनामा आएसँगै उनले बयान फेरेकी थिइन्। तर उनी धेरै विवादमा आएको भन्दै उनका पतिले समेत छुट्टिने सहमति गरेपछि भने उनले शुक्रबार प्रहरीमा जाहेरी दिएको प्रहरीले जानकारी दियो। 

पछिल्लो समय ‘आफू डिप्रेसनको शसकार भएको भन्दै शाहीले महरा आफ्नो बाबुजस्तो भएको समेत बताएकी थिइन् तर चौतर्फी दबाबपछि भने उनले महराविरुद्ध जाहेरी दिएकी हुन्।  प्रहरीले अहिले विस्तृत अनुसन्धान गरिरहेकोले थप बोल्न नमिल्ने जनाएको छ।