आज दसैंको छैटौं दिन, कात्यायनी देवीको पूजा आराधना गरिँदै 

काठमाडौं- नेपालीको महान चाड वडादसैंको छैटौं दिन अर्थात् आश्विन शुक्ल षष्ठीमा आज कात्यायनी देवीको पूजा आराधना गरी मनाइँदैछ।

आजको दिन पूर्वोक्त विधि अनुसार स्थापित देवताहरूको पूजा गरी दुर्गाको प्रतिमामा कात्यायनी देवीको पूजा गरिन्छ। 

कुपुत्रो जायेत क्वचिदपि 
कुमाता नभवति।
अर्थात् 
सांसारिक सृष्‍टिका क्रममा आफ्नो कर्तव्यबाट च्युत हुने पुत्र जन्मिएता पनि सृष्‍टि कारिणी आमा कहिले पनि कुमाता हुन सक्दिनन्। 

कात्यायनी यज्ञ रक्षा र देवताहरूको कार्य सिद्धिका लागि महर्षि कात्यायनको आफ्नो आश्रममा प्रकट भएकी कन्यालाई छोरी बनाएकाले ती देवीको नाम  कात्यायनी रहन गएको हो। 
 
आज साँझ फूलपातीका रूपमा प्रयोग गरिने बेलको बोट भएको ठाउँमा गइ दुईवटा फलले युक्त वायव्य वा नैर्ऋत्य दिशातर्फ फर्केको हाँगालाई पूजा गर्दै फूलपातीलाई निमन्त्रण गर्ने प्रचलन छ।