उजुरी परे महरा पक्राउ पर्छनः प्रहरी 

काठमाडौं- सभामुख कृष्णबहादुर महराले एक महिलालाई बलात्कार गरेको अरोपको घटनामाथि अनुसन्धान शुरु गरेको प्रहरीले महरालाई पक्राउ गर्न भने पीडितको उजुरी पर्खेको जनाएको छ । 

आइतबार राति  महराले संसद सचिवालयमा कार्यरत महिलालाइ उनी बस्ने तिनकुनेस्थित  डेरामा पुगेर बलात्कार गरेको आरोप लागेको छ । 

आइतबार राति नै उक्त घटनाको जानकारी पाएपछि ती महिलाको डेरामा पुगेर सामान्य विवरण संकलन गरी फर्केको प्रहरीले मंगलबार महराले राजीनामा गरेपछि पुनः केही सामाग्री संकलन गरेको छ ।

प्रहरीले महिलाको कोठबाट महराले प्रयोग गर्ने  भनिएको भाँचिएको चस्मा, जुत्ताको तलुवा र रक्सीको बोतल लगायतका सामाग्री बरामद गरेको हो । 

नेपाल समयसँग कुरा गदै महानगरीय प्रहरी परिसरका प्रमुख, एसएसपी उत्तमराज सुवेदीले  भने “पीडितले प्रहरीको कन्ट्रोल नम्बर १०० मा टिपाएको उजुरीका आधारमा अनुसनधान अगाडि बढेको छ । जाहेरी पर्‍यो भने हामी उहाँ (पुर्व सभामुख महरा) लाई नियन्त्रणमै लिएर अनुसन्धान गर्छौं ।” 

सुवेदीका अनुसार लिखित उजुरी नपर्दासम्म महरा पक्राउ पर्ने छैनन् । 

आइतबार राति करिब ९ बजे पीडित भनिएकी महिलाले प्रहरीको १०० नम्बरमा फोन गरी बलात्कार भएको जानकारी गराएपछि प्रहरी राति नै उनको डेरामा पुगेको थियो । 

बानेश्वर प्रहरी वृतकी डिएसपी दुर्गा रेग्मी नेतृत्वको टोलीले  घटनास्थलको मुचुल्का संकलन गरेको र ती महिलालाई मेडिकल जाँच गराउन भनी फिर्ता भएको थियो ।

महराका विरुद्ध पीडित महिलाले मंगलबार साँझसम्म किटानी जाहेरी दिएकी छैनन् । उनको स्वास्थ्य परिक्षण समेत गरिएको छैन ।