काठमाडौ– कृषि विकास बैंकमा भएको करिव ३ करोड रुपैयाँ चोरीमा बैंककै कर्मचारी संलग्नता रहेको पाइएको छ ।
सोमबार र मंगलबार बैंकबाट अस्वाभाविक रुपमा कारोबार भएको जानकारी पाएको बैंकले आफ्नै कर्मचारीहरुलाई समेत निगरानीमा राखी शंका लागेपछि प्रहरीलाई जानकारी गराएको थियो ।
बैंकको आग्रहपछि सक्रिय भएको प्रहरीले मंगलबार बैंककै तीन जना कर्मचारीलाई रकम निकाल्दै गर्दा पक्राउ गरेको छ भने बाँकी सात जना पक्राउ गरिएको बताए पनि उनीहरुको नाम सार्वजनिक गरेको छैन ।
बुधबार दिउँसो दुई बजे पत्रकार सम्मेलन गरेर महानगरीय अपराध अनुसन्धान महाशाखाले यसबारे विस्तृत विवरण सार्वजनिक गर्ने बताएको छ । प्रहरीका अनुसार रकम चोरीमा बैंककै कर्मचारीको संलग्नता भने पुष्टी भइसकेको छ ।
रकम चोरीमा कृषि विकास बैंकको लहान शाखा प्रमुखको युजर नेम र पासर्वर्ड प्रयोग भएको पाइएको प्रहरीको अनुसन्धानले देखाएको छ ।
शाखा प्रबन्धकको युजर नेम र पाववर्ड प्रयोग गरी विभिन्न व्यक्तिको नाममा तीन करोड रुपैयाँ ट्रान्सफर गरिसकेको र डेढ करोड रुपैयाँ खाताबाट झिकिएको पनि प्रहरीको अनुसन्धानमा भेटिएको छ ।
लहान शाखाका म्यानेजर आन्तरिक तालिममको लागि काठमाडौंमा नै छन् । सोही मौकामा उनको युजरनेम र पासवर्ड लिएर काम गर्ने कर्मचारी र स्वयम् म्यानेजरलाई समेत प्रहरीले नियन्त्रणमा लिएको बैंकका एक संचालकले जानकारी दिए ।
गत असार मसान्तसम्मको नाफाको हिसाबकिताब रुजु भइसकेकाले त्यो रकम नचलाई साउन र भदौ महिनाको नाफाबाट डेबिट गरेर रकम ट्रान्सफर गरिएको पाइएको छ । अर्को अडिट नभएको अवस्थामा बैंकको नाफा चोरी गरिएको हो ।
उता बैंकले बैंकले ग्राहकहरुको रकम सुरक्षित रहेको स्पष्ट पार्दै बैंकको नाफाबाट नै रकम चोरीएको र चोरी भएको रकम सहित चोरी गर्ने व्यक्ति समातिएको जनाएको छ ।
कृषि विकास बैंकबाट ३ करोड चोरी : १० जना पक्राउ