सुख्खा पहिरोले पुरेर प्राविधिकको ज्यान गयो

पोखरा - मध्यपहाडी लोकमार्ग विस्तारको क्रममा पर्वत खण्डअन्तर्गत कुश्मा नगरपालिका–७ खरेयामा पहिरो जाँदा एकजनाको मृत्यु भएको छ। मृत्यु हुनेमा मोरङको बेलबारी नगरपालिका–२ का २७ वर्षीय कमल राई छन्। राई मध्यपहाडी लोकमार्ग आयोजनाका सबओभरसियर हुन्। 

बाटो नापजाँच गरिरहेका बेला माथिबाट ढिस्कोसहित आएको पहिरोले राईलाई पुरेको प्रहरीले जनाएको छ। बिहान १० बजेतिर पहिरो गएर पुरिएका राईको शव प्रहरीले डोजरको सहायतामा खनेर फेला पारेको थियो। 

शव पोस्टमार्टमका लागि पर्वत अस्पतालमा राखिएको छ। स्तरोन्नतिका क्रममा रहेको मध्यपहाडी लोकमार्गमा वर्षाका कारण दैनिकजसो पहिरो खस्ने समस्या देखिएको छ।