चिनियाँ कम्युनिस्ट पार्टीका विदेश विभाग प्रमुख नेपाल आउँदै    

काठमाडौं- चिनियाँ कम्युनिस्ट पार्टी (सीसीपी)का विदेश विभाग प्रमुख सोङ ताओ आज नेपाल आउँदै छन्। 

नेकपाका विदेश विभाग प्रमुख माधवकुमार नेपालको निमन्त्रणामा आज काठमाडौंमा सुरु हुन लागेकाे चिनियाँ कम्युनिस्ट पार्टी र सत्तारुढ नेपाल कम्युनिस्ट पार्टी (नेकपा)को अन्तरक्रियामा सहभागी हुन उनी नेपाल आउन लागेका हुन्। उनी थाइल्यान्डबाट दिउँसो १२ः२५ मा त्रिभुवन विमानस्थल ओर्लने कार्यक्रम रहेको नेकपाले जनाएको छ। 

अन्तक्र्रियामा सहभागी हुन चिनियाँ कम्युनिस्ट पार्टीको विदेश, पार्टी स्कुल र संगठन विभागका ४० जना यसअघि नै काठमाडौं आइसकेका छन्।

अन्तरक्रियामा साँझ ५ बजे सुरु हुने नेकपाले जनाएको छ। 

अन्तरक्रियाकै बीचमा चिनियाँ कम्युनिस्ट पार्टी र नेपाल कम्युनिस्ट पार्टीबीच समझादारीपत्रमा हस्ताक्षर हुने योजना छ। नेकपाका विदेश विभाग प्रमुख माधवकुमार नेपाल र चिनियाँ कम्युनिस्ट पार्टीका विदेश विभाग प्रमुख सोङ ताओले दुई पार्टीबीचको समझदारी पत्रमा हस्ताक्षर गर्नेछन्।