काठमाडौं- नेकपा एमाले र जनता समाजवादी पार्टीबाट निर्वाचित प्रदेशसभा सदस्य र स्थानीय तहका जनप्रतिनिधिहरुले भदौ २२ गतेसम्म दल रोज्न पाउने भएका छन्। निर्वाचन आयोगको आइतबारको बैठकले दल रोज्न भदौ २२ गते बेलुका ५ बजेसम्मको समयसीमा तोक्ने निर्णय गरेको हो।
अब यी दुवै दलबाट नयाँ दल रोज्न चाहने प्रदेश सांसदले प्रदेश निर्वाचन कार्यालय प्रमुख र स्थानीय जनप्रतिनिधिको हकमा जिल्ला निर्वाचन कार्यालय प्रमुखको रोहबरमा सनाखत गर्नुपर्ने भएको छ।
प्रदेश निर्वाचन कार्यालयले प्रदेश सभा तथा स्थानीय तहका सदस्यको सनाखत गराउँदा छुट्टाछुट्टै स्थानमा छुट्टाछुट्टै रजिस्टर खडा गरी सनाखत गराउने व्यवस्था मिलाउन आयोगले सम्बन्धित कार्यालयलाई निर्देशन समेत गरेको छ।
एमालेबाट विभाजन भएर माधवकुमार नेपालको नेतृत्वमा नेकपा (एकीकृत समाजवादी) गठन भएको छ भने महन्थ ठाकुरको नेतृत्वमा लोकतान्त्रिक समाजवादी पार्टी गठन भएको छ।
यसअघि सरकारले राजनीतिक दलसम्बन्धी अध्यादेश ल्याएर यी दुई दल बन्ने बाटो सहज बनाइदिएको थियो। उक्त अध्यादेशमा प्रदेशका सांसद र स्थानीय तहका जनप्रतिनिधिले नयाँ दल दर्ता भएको २१ दिनसम्म दल रोज्न पाउने व्यवस्था गरेको थियो।