माथिबाट खसेको ढुङ्गा लागेर मोटरसाइकल कुदाइरहेका चालकको मृत्यु

काभ्रेपलाञ्चोक- काभ्रेपलाञ्चोकको रोशी गाउँपालिका–७ बिपी राजमार्गअन्तर्गत कटुञ्जेस्थित सडकमा गुडिरहेको मोटरसाइकलमा माथिबाट खसेको ढुङ्गा लागेर चालकको मृत्यु भएको छ। धुलिखेलबाट जनकपुरतर्फ जाँदै गरेको ज ८ प ७४९० नम्बरको मोटरसाइकलमा सवार दुई जनालाई ढुङ्गा लागेर घाइते भएको र उपचारका क्रममा चालकको मृत्यु भएको हो। 

जिल्ला प्रहरी कार्यालय काभ्रेका प्रहरी नायब उपरीक्षक हरि खतिवडाका अनुसार मृत्यु हुनेमा महोत्तरीको रामगोपालपुर घर भएका वर्ष २८ का सरोजकुमार साह छन्। मोटरसाइकल चालक साहको धुलिखेल अस्पतालमा उपचारका क्रममा मृत्यु भएको हो। 

साहको शव अस्पतालमा नै रहेको प्रहरीले जनाएको छ। सोही मोटरसाइकलका पछाडि सवार रहेका धनुषाको रामानन्दचोक घर भएका वर्ष ३० का सतिशकुमार साहको भने घाइते भई अस्पतालमा उपचार भइरहेको प्रहरीले जनाएको छ। प्रहरीका अनुसार साहको पेट र अनुहारमा चोट लागेको र उनको अवस्था सामान्य रहेको छ। -रासस