अफगानिस्तानमा गएको अगस्त महिनामा दैनिक औषतमा ७४ जनाको मृत्यु भएको छ ।
हिंसाबाट हुने मानवीय क्षतिबारे आकलन गर्न
बीबीसीले अफगानिस्तानमा गरेको खोजमा गएको एक महिनामामात्र २ हजार ३०७ व्यक्ति मारिएको पाइएको हो । यो अवधिमा सुरक्षा कमजोरीबाट भएका कुल ६११ घटनामा १ हजार ९४८ व्यक्ति घाइते भएका थिए ।
अमेरिकाले युद्धग्रस्त अफगानिस्तानमा तैनाथ आफ्ना सैनिक फर्काउन खोजिरहेको चर्चा चलेसँगै हिंसाका घटनाहरुमा पनि बढोत्तरी भएको छ ।
अफगानिस्तानमा जारी युद्धमा मारिनेहरु अधिकांश आम नागरिक र तालिबानी लडाकुहरु छन् ।
सेप्टेम्बर महिनाको अन्त्यमा अफगानिस्तानमा राष्ट्रपतिको निर्वाचन हुँदैछ र उक्त निर्वाचन विथोल्न खोजिरहेको तालिवानले हिंसाका घटनाहरु पनि बढाउँदै लगेको छ ।
इस्लाममा मनाइने पर्व ईद– उल–अजहाका बेला तालिबान र अफगान सरकारले तीन दिनसम्म औपचारिक युद्धविराम गरेका थिए । तर, बीबीसीका अनुसार यही पर्वका बेला ९० जना मानिस मारिए ।
२७ अगस्तमा भएको एक हवाई आक्रमणमा १६२ जनाको मृत्यु भएको थियो भने ४७ जना घाइते भएका थिए । मृत्यु हुनेमध्ये अधिकांश तालिबान लडाकु थिए ।
त्यस्तै १८ अगस्तमा काबुलमा आयोजित एक विवाह समारोहमा भएको आत्मघाती आक्रमणमा ९२ जनाको मृत्यु हुनुका साथै १४२ जना घाइते भएका थिए । त्यसै दिन भएका अन्य आक्रमणमा समेत गरेर ११२ जनाको मृत्यु भएको थियो । यो आक्रमणको जिम्मेवारी इस्लामिक स्टेटले लिएको थियो ।
गएको अगस्त महिनामा भएका मृत्युका आधाभन्दा बढी घटनामा विद्रोही तालिबान प्रत्यक्ष जिम्मेवार थियो । तालिबानसँग अहिले पनि करिब ३० हजार हथियारसहितका लडाकु भएको अनुमान गरिन्छ ।
गएको जनवरी महिनामा अफगानिस्तानका राष्ट्रपति अशरफ गनीले सन् २०१४ यता सुरक्षा बलका ४५ हजार सदस्य मारिएको बताएका थिए ।
अफगानिस्तान: राष्ट्रपति सहभागी कार्यक्रममा विस्फोट, कम्तीमा २४ को मृत्यु