काठमाडौं– नेकपा एकीकृत समाजवादी अध्यक्ष माधवकुमार नेपालले आफूहरू कुनै पार्टीसँग एकता नगर्ने बताएका छन्। एमालेबाट अलग भएर समाजवादी गठन गरेपछि पहिलोपटक बसेको पार्टी संसदीय दलको बैठकलाई आइतबार सम्बोधन गर्दै अध्यक्ष नेपालले बाहिर हल्ला भएजस्तो आफूहरु कुनै पार्टीसँग एकता नगर्ने बताएका हुन्। उनले भने, ‘पार्टीभित्र लोकतान्त्रिक पद्धति स्वीकार्दै अगाडि बढिनेछ। मुलुक र जनतको हितका लागि क्रियाशील भइनेछ।’
उनले आफ्नो पार्टी स्थापित हुने दाबी गरेका छन्। उनले भने, ‘नयाँ पार्टीहरु नचलेको भन्दै समाजवादीप्रति टिप्पणी भइरहेको छ। पुष्पलालदेखि तुल्सीलालसम्मको क्रान्तिकारी र विद्रोहीचेत बोकेर गठन भएको समाजवादी पनि स्थापित हुन्छ।’
आउँदो पुस्तालाई जिम्मेवारी सुम्पिँदै अघि बढेका बताएका उनले फिँजाइएका भ्रमलाई चिर्ने जानकारी दिए। राष्ट्र र जनताको स्वार्थ आफूहरूको स्वार्थ रहेको बताएका उनले बाह्य मुलुकहरूसँग हातेमालो गर्दै अघि बढ्ने बताए ।
वैदेशिक हस्तक्षेपलाई अस्वीकार गर्ने र पञ्चशीलको सिद्धान्तलाई आत्मसाथ गर्दै एकीकृत समाजवादी अघि बढ्ने अध्यक्ष नेपालको भनाइ छ।
‘आफूले राम्रो काम गरेको, भ्रष्टाचारीलाई कारबाही गरेको बताउने ओलीले महालेखाको प्रतिवेदन एकचोटि पढे हुन्छ नि’, अध्यक्ष नेपालले भने।