कर्णाली प्रदेशका मुख्यमन्त्री सुझाव खोज्दै काठमाडौंमा

काठमाडौं- कर्णाली प्रदेशका मुख्यमन्त्री महेन्द्रबहादुर शाहीले कर्णाली प्रदेशबाट काठमाडौंमा आएर पत्रकारिता गरिरहेका पत्रकारहरुसँग अन्तक्र्रिया गरेका छन्।

समृद्ध कर्णाली प्रदेश बनाउने अभियानका लागि विभिन्न क्षेत्रका विज्ञहरुसँग छलफल गरिसकेका मुख्यमन्त्री शाहीले शुक्रबार पत्रकारहरुसँग अन्तक्र्रिया गरेका हुन्।

कर्णाली प्रदेशलाई अग्र्यानिक प्रदेश बनाउने अभियानको सुरुवात गरेका मुख्यमन्त्री शाहीले प्रदेशभित्र रहेका स्रोत साधनको सदुपयोग गरी त्यसमार्फत् कर्णालीलाई समृद्ध बनाउन सकिने आधारहरुबारे छलफल गरे। 

सुझाव दिने क्रममा पत्रकारहरुले प्रदेशभित्र रहेका विशेष उत्पादनहरुको प्रबद्र्धन, संरक्षण तथा बजारीकरणमा सरकारले जोड दिनुपर्ने सुझाव दिए।

मुख्य जडिबुटीका रुपमा रहेको यार्सागुम्बाको व्यवस्थित बजारीकरण, स्याउ लगायत उच्च हिमाली क्षेत्रमा उत्पादन हुने फलफूल तथा अन्नहरुको पकेट क्षेत्र बनाएर सरकारले काम गर्नुपर्ने सुझाब पत्रकारले दिएका थिए।

पत्रकारहरुले त्यस क्षेत्रका सांस्कृतिक, धार्मिक तथा पर्यावरणीय क्षेत्रको प्रबद्र्धन गरी पर्यटकीय गन्तव्यका रुपमा विकास गर्न सरकारले विशेष कार्यक्रम ल्याउनुपर्नेमा जोड दिए।

त्यस्तै विकासका नाममा विनास गर्ने काम रोक्न र विकास निर्माणमा यान्त्रिक उपकरणको सही प्रयोगमा पनि सरकार चनाखो बन्न पत्रकारले सुझाब दिए।

अन्तक्र्रियामा मुख्यमन्त्री शाहीले सरकारले जनजिविकासँग जोडिएका सवालहरुमा, अत्यावश्यक पूर्वाधार निर्माण तथा केही विशेष क्षेत्रमा बाह्य लगानी भित्र्याउने गरी काम गरिरहेको बताए।

कर्णाली प्रदेश योजना आयोगका सदस्य योगेन्द्र शाहीले कर्णालीमा थुप्रै स्रोतका भण्डार रहेको र तीनको सदुपयोग कसरी गर्ने भन्नेबारे आफूहरुले अध्ययन गरिरहेको बताए।

अर्का सदस्य दिपेन्द्र रोकायाले आफूहरु पहिलो पञ्चवर्षीय योजनामा रहेको र केही विषेश गर्ने प्रयासमा रहेको बताए।

कार्यक्रममा राष्ट्रिय समाचार समितिका कार्यकारी अध्यक्ष हरिहर अधिकारी (श्यामल) ले विकासका नाममा विनास भएको छ कि भन्नेतर्फ सरकार सजग हुनुपर्नेमा सचेत गराए।