नेपाल-चीन सम्बन्ध अझ सुदृढ हुन्छ : दाहाल

काठमाडौं- नेकपा अध्यक्ष पुष्पकमल दाहालले चिनियाँ विदेशमन्त्री वाङ यीको नेपाल भ्रमणले दुई देशबीचको सम्बन्ध थप सुदृढ हुने बताएका छन्। 

विदेशमन्त्री वाङसँग मंगलबार भएको भेटवार्तापछि सञ्चारकर्मीसँग कुरा गर्दै दाहालले आउने दिनमा नेपाल–चीन सम्बन्ध थप प्रगाढ हुने बताए। भेटमा दुई देशका सरकारबीच गरिने सहकार्य, सहयोग विस्तार र चिनियाँ राष्ट्रपति सी चिनफिङको नेपाल भ्रमणबारे छलफल भएको थियो। दाहालले विदेशमन्त्री वाङ नेपालको विकास प्रक्रियामा निकै सकारात्मक रहेको पाएको बताए।

‘वाङको नेपाल भ्रमणले आउने दिनमा नेपाल–चीन सम्बन्ध अझ सुदृढ भएर जाने मैले विश्वास लिएको छु’, दाहालले भने, ‘नेपालको आर्थिक विकास प्रयासमा सहयोग मात्रात्मक रुपमा मात्र हैन, गुणात्मक रुपमा अघि बढ्नेछ।’ नेपालको आर्थिक विकास प्रयासमा चीन सरकार र चिनियाँ जनताबाट हुने सहयोग र नेपालको अपेक्षाबारे पनि कुराकानी भएको दाहालले जानकारी दिए। 

भेटमा दुई देशबीचमा रहिआएको सदीयौँ पुरानो मित्रतापूर्ण सम्बन्ध सुदृढ गर्ने विषयमा पनि छलफल भएको थियो। दाहालले नेकपा र चिनियाँ कम्युनिस्ट पार्टीबीच सम्बन्ध सुधारमा पनि वाङको भ्रमण फलदायी भएको दाबी गरे।