सांसदद्वारा गौहत्याका दोषीलाई कारवाही माग

काठमाडौं- सांसदहरूले सुर्खेतमा गाई मारिएको घटनाका दोषीलाई कारवाही माग गरेका छन् । 

प्रतिनिधिसभाको बुधबारको बैठकमा उनीहरूले घटना नियतवश गराइएको भन्दै दोषीलाई कारवाहीको माग गरेका हुन् । संसदमा यसबारे बोल्ने अधिकांश सांसद्ले नेपालगन्ज उपमहानगर प्रमुख, बाँकेका प्रमुख जिल्ला अधिकारी र प्रहरीमाथि छानबिन गर्नुपर्ने धारणा राखे । 

नेपाल कम्युनिस्ट पार्टी (नेकपा)का सांसद राजबहादुर बुढा क्षेत्रीले नेपालगन्जका मेयरलाई लक्षित गर्दै हिन्दु धर्मको अगुवा भन्नेहरू र गाई चुनाव चिह्न भएकाहरूबाटै घटना भएको भन्दै राष्ट्रिय प्रजातन्त्र पार्टीमाथि कटाक्ष गरे । ‘अहिले अरु पार्टीका मेयरले यस्तो गल्ती गरेको भए राप्रपाले जुलुस निकालिसक्थ्यो,’ उनले भने । 

नेपाली कांग्रेसकी सांसद डिला संग्रौलाले गाई–गोरु दैलेख लैजाने भन्दै नियोजित ढंगले हत्या गरिएको आरोप लगाइन् । 

अर्का सांसद नवराज रावतले नेपालगन्ज उपमहानगरका मेयर धवलशम्शेर राणा गौहत्यामा संलग्न रहेको आरोप लगाए । उपमहानगरले नक्कली कागजात बनाएर गाई सुर्खेत लगी भीरबाट खसाएको उनको आरोप थियो । कागजपत्र बनाउन बाँकेका प्रमुख जिल्ला अधिकारी, प्रहरी र उपमहानगरका प्रशासकीय अधिकृत संलग्न रहेको उनले आरोप लगाए । 

यसबारे नेकपाका कृष्णप्रसाद दाहाल, इन्दु शर्मा र कांग्रेसका देवेन्द्रराज कँडेलले दोषीलाई कारवाहीको माग गरे । 

नेपालगन्ज उपमहानगरले दैलेखको श्रीस्थानका लागि आठवटा ट्रकमा पठाएको भनिएका २ सय ९१ गाई-गोरुमध्ये ४० सुर्खेतमा मरेको अवस्थामा भेटिएका थिए ।