१ अमेरिकाको दक्षिणी प्रान्त फ्लोरिडा क्षेत्रमा राष्ट्रपति डोनाल्ड ट्रम्पले आपतकालीन स्थितिको घोषणा गर्ने भएका छन् । डोरियन नामक सामुद्रिक आँधी फ्लोरिडातर्फ बढिरहेको प्रशासनले जानकारी गराएपछि राष्ट्रपति ट्रम्पले यस्तो कदम चालेका हुन् ।
२ मलेसियाका प्रधानमन्त्रीले साझा समृद्धिका लागि देशवासीलाई आह्वान गरेका छन् । मध्यम आयको स्थितिमा मुलुक पुगे पनि आर्थिक–सामाजिक उतारचढावबाट मलेसिया गुज्रिरहेको छ । मलेसियालाई समृद्ध र स्वायत्त बनाउन आम मलेसियाली जनतासमक्ष यस्तो अवधारणा राखेका हुन् ।
३ अमेरिका र इरानबीच तनाव बढ्दै गएको छ। इरानले मध्यपूर्वमा अमेरिकी सैन्य युद्द शिविरहरू रहुञ्जेल विश्व समुदायले समग्र मध्यपूर्व तथा उत्तर अफ्रिकी क्षेत्रमा कुनै प्रकारको शान्त र मैत्री वातावरण अपेक्षा गनुर्् व्यर्थ भएको जनाएको छ ।
४ भारतीय जनता पार्टीका नेता सुब्रम्हण्यम स्वामीले भारतले समयमै नयाँँ आर्थिक नीति नअपनाउने हो भने ५ ट्रिलियन अमेरिकी डलर बराबरको अर्थतन्त्र बनाउने वर्तमान सरकारको लक्ष्य पूरा नहुने बताएका छन् । गत वर्ष ८ प्रतिशतको आर्थिक वृद्धि हासिल गरेको भारतले चालू आर्थिक वर्षको पहिलो त्रैमासिक समीक्षामा मुलुकको कुल गार्हस्थ उत्पादन एवम् प्रतिव्यक्ति आयमा ५ प्रतिशत मात्रै वृद्धि गरेको तथ्यांक सार्वजनिक भएको छ ।
५ मुलुकले प्रदान गरेको भाषिक समानताको संवैधानिक प्रावधानलाई अवज्ञा गरेको आरोपमा एअर क्यानाडाले एक फ्रेन्च दम्पतिलाई २१ हजार क्यानेडियन डलर क्षतिपूर्ति तिराएको छ । विमानमा सवार गर्ने क्रममा ति दम्पत्तिले बुझ्ने फ्रेन्च भाषाको प्रयोग अत्यन्त न्यून भएको र तिनले अन्य भाषा बुझ्न नसकेको हुँदा सञ्चारमा समस्या आएको गुनासो अदालतसमक्ष गरेका थिए ।
६ सिरियाली सेनाले मुलुकको उत्तरपूर्वी इड्लिब प्रान्तमा एकतर्फी रूपमा युद्दविराम गर्न तयार भएको छ । यो सिरियाकै द्वन्द्वग्रस्त प्रान्त हो । युद्दबिरामपछि विद्रोही समूहबीच शान्ति वार्ता हुने अपेक्षा गरिएको छ ।
७ श्रीलंका पर्यटनका लागि सुरक्षित गन्तव्य रहेको श्रीलंकाली सेनाले जनाएको छ। केही वर्षअघि मात्रै सेनाले विद्रोही बाहुल्य क्षेत्रमा एकतर्फी दमन गरी सबै लडाकुहरूको सफाया गरेको थियो ।
८ लोकतान्त्रिक गणतन्त्र कंगोमा इबोला भाइरसको संक्रमणबाट झण्डै ६ सय बालबालिकाले ज्यान गुमाएको तथ्यांक सार्वजनिक गरिएको छ । संयुक्त राष्ट्रसंघीय बालबालिका कोषले सार्वजनिक गरेको तथ्यांक अनुसार उक्त भाइरसबाट झन्डै ८ सय ५० बालबालिका संक्रमित भएका थिए ।
९ अमेरिकाको अलाबामा राज्यस्थित विद्यालयमा फुटबल प्रतियोगिताका क्रममा अन्धाधुन्ध गोली चल्दा १० जना घाइते भएका छन् । तीमध्ये आधाको अवस्था गम्भीर रहेको अधिकारीहरूले जनाएका छन् ।
प्रकाशित: Dec 31, 2017| 18:23 आइतबार, पुस १६, २०७४