बुहारी हत्याको अभियोग लागेका व्यक्तिको कारागारमा मृत्यु

जनकपुरधाम- बुहारी हत्याको अभियोगमा महोत्तरीको जलेश्वर कारागारमा रहेका एक थुनुवाको मृत्यु भएको छ। जनकपुरधाम–२ किशोरी नगर बस्ने ६७ वर्षीय देवनारायण ठाकुरको बुधबार मृत्यु भएको हो।

विगत दुई वर्षदेखि जलेश्वर कारागारमा रहेका ठाकुरको उच्च रक्तचापबाट ज्यान गएको प्रहरीले जनाएको छ।

अचानक रक्तचाप उच्च भएपछि उनलाई उपचारको लागि जलेश्वरस्थित शान्ति सामुदायिक अस्पतालमा भर्ना गरिएको थियो। ठाकुरको उपचारकै क्रममा मृत्यु भएको जेलर मकसुदन महासेठले जानकारी दिए।

ठाकुर २०७४ पुष ९ गतेदेखि जलेश्वर कारागारमा पुर्पक्षका लागि थुनामा थिए। कान्छा छोरा आनन्दमोहन शर्माकी श्रीमती २२ वर्षीय रञ्जना शर्माको हत्या अभियोगमा जिल्ला अदालत धनुषाले ठाकुरलाई पुर्पक्षका लागि जलेश्वर कारागारमा राख्न आदेश दिएको थियो।

आनन्दमोहन र रञ्जनाको विवाह भएको एक वर्षमात्र भएको थियो। जनकपुरस्थित कृष्णा नर्सिङ कलेजमा अध्ययनरत रञ्जना २०७४ मंसिर ८ गते बिहान आफ्नो घरमा मृतअवस्थामा फेला परेकी थिइन्।

छोरीको हत्या भएको भन्दै सिरहा नगरपालिका–१८ लक्ष्मीनिया बस्ने रञ्जनाकी आमा प्रभा देवी शर्माले उनका ससुरा देवनारायण, श्रीमान् आनन्दमोहन, जेठाजु अरबिन्दकुमार शर्मा, जेठाजुकी श्रीमती रिंकु शर्मा र सासु सुमित्रा शर्माविरुद्ध जिल्ला प्रहरी कार्यालय धनुषामा किटानी जोहेरी दिएकी थिइन्। तर ससुरा देवनारायणले घटनाको सम्पूर्ण जिम्मेवारी आफैले लिएपछि परिवारका अन्य सदस्यहरु जोगिएका थिए।