काठमाडौं– सत्तारुढ नेपाल कम्युनिष्ट पार्टी (नेकपा)का एक अध्यक्ष पुष्पकमल दाहालले पहिलो पटक पार्टीको कार्यकारी अधिकार पाएका छन् ।
बिहीबार बिहान प्रधानमन्त्री निवास बालुवाटारमा बसेको नेकपाको सचिवालय बैठकले दाहाललाई कार्यकारी अधिकार दिएको हो ।
नेकपाका अर्का अध्यक्ष एवं प्रधानमन्त्री केपी शर्मा ओली स्वास्थ्य उपचारका लागि सिंगापुर जाने भएकाले एकताको प्रक्रिया पूरा गर्ने जिम्मेवारी पनि प्रचण्डलाई नै दिइएको छ।
प्रवक्ता नारायणकाजी श्रेष्ठका अनुसार बुधबारको बैठकमा पार्टी एकता र जिम्मेवारी बाँडफाँडका विषयमा छलफल भए पनि सहमति जुट्न सकेन।
सहमति जुट्न नसक्दा एकता प्रक्रियाको सम्पूर्ण कार्य पूरा गर्न अध्यक्ष दाहाललाई जिम्मेवारी दिइएको श्रेष्ठले जानकारी दिए ।
केही दिनभित्रै दाहालले बैठक बोलाएर एकता प्रक्रिया टुंगो लगाउने श्रेष्ठले बताए।
केही दिनअघि मात्र स्वास्थ्य उपचार गरी सिंगापुरबाट फर्केका ओली बुधबार पुनः उपचारका लागि सिंगापुर जाँदैछन्। प्रधानमन्त्री ओलीको सचिवालयका अनुसार ओलीको उपचारमा समय लाग्न सक्नेछ।
प्रकाशित: Dec 31, 2017| 18:23 आइतबार, पुस १६, २०७४