राष्ट्रिय सम्मेलनलाई लिएर थारु अगुवा नै विभाजित

धनगढी - भदौ ७ गतेबाट कैलालीको टीकापुरमा सुरु हुने थारुवान-थरुहटको राष्ट्रिय सम्मेलन सामाजिक सद्भाव कायम गर्नका लागि हुन लागेको आयोजकले जनाएको छ। थारुवान-थरुहटको राष्ट्रिय सम्मेलन केन्द्रीय तयारी समितिले पत्रकार सम्मेलन गरी सो कुराको जानकारी दिएको हो।

थरुहट/थारुवान आन्दोलनकारी र प्रहरीबीच दोहोरो झडप हुँदा २०७२ भदौ ७ गते एक नावालक र आठ सुरक्षाकर्मीको ज्यान गएकै दिनमा सम्मेलन हुन लागेको हो। सोही दिनको सम्झनामा टीकापुरमा पहाडी र थारु समुदायबीचको तिक्तता अन्त्य गर्दै सामाजिक सद्भाव कायम गर्न सो सम्मेलनको आयोजना गरेको  पूर्व सांसद कृष्ण कुमार चौधरीले बताए। बिहीवार टीकापुरमा सरसफाई गरी ६ र ७ गते रक्तदान कार्यक्रम गरिनेसमेत उनले जानकारी दिए । 

सम्मेलनको अवधिभर खानेपानी र पुष्प गुच्छाले सहभागी हुन आउनेलाई स्वागत गर्ने, प्रतिकात्मक रुपमा थारुको घरमा पहाडी र पहाडीको घरमा थारु समुदायका मानिसलाई बसाउने कार्यक्रम तय भएको लक्ष्मण चौधरीले बताए।

सम्मेलनको नारा 'थरुहट-थारुवान एकता र सामाजिक सद्भावका लागि टीकापुर राष्ट्रिय सम्मेलन, संविधान संशोधनसहित थरुहट/थारुवान स्वायत्त प्रदेशका लागि हाम्रो आन्दोलन' रहेको छ।

सम्मेलनमा काठमाडौं उपत्यकासहित तराईका २४ जिल्ला र विदेशमा रहेका थारु संघ संस्थाहरुकोसमेत सहभागिता हुने आयोजकले जनाएको छ।

थारु अगुवाहरु विभाजित

यसैबीच टीकापुरमा आयोजना हुने  सम्मेलनलाई सत्तारुढ नेकपा निकट थारु राष्ट्रिय मुक्ति मोर्चा र नेपाल लोकतान्त्रिक थारु संघले उद्देश्यविहीन कार्यक्रम भएको आरोप लगाएको छ।

ती दुई संस्थाले बुधबार टीकापुरमा पत्रकार सम्मेलन गरी संस्थागत सहभागिता नहुने बताएका छन्। पत्रकार सम्मेलनमा नेकपाका नेता फिरुलाल चौधरी (रणभूमि) ले सम्मेलनमा अवरोध भने नहुने बताए। उनले केही व्यक्तिहरु सम्मेलनका नाममा हिरासतमा रहेका रेशमलाल चौधरी लगायतको नाम बेचेर आफ्नो राजनीतिक दूनो सोझ्याउने तर्फ लागिरहेको बताउँदै ती व्यक्तिहरु थारु फुटाउ अभियानमा सकृय रहेको आरोप लगाए। उनीहरुले विगतको आन्दोलनको क्रममा घटेको दुःखद घटनालाई स्मरण गराउने गरी कार्यक्रम आयोजना भएको आरोप लगाएका छन्।

यस्तै अर्को सतारुढ दल समाजवादी पार्टी नेपालका कार्यकर्ता भने सम्मेलनको तयारीमा जुटेका छन्। पूर्वसांसद कृष्णकुमार चौधरीलगायत सम्मेलनको तयारीमा संलग्न छन्। सो पार्टीका नेता डा. बाबुराम भट्टराई सम्मेलनको उद्घाटन समारोहमा सहभागी हुने तय भैसकेको छ।