पिएसजीलाई रेनेसको चुनौती

एजेन्सी- पेरिस सेन्ट जर्मन (पिएसजी)ले लिग वान अन्तर्गत आज (आइतबार) रेनेससँग आफ्नो दोस्रो खेल खेल्दै छ । खेल रेनेसको घरेलु मैदानमा नेपाली समय अनुसार राती १२:४५ बजे सुरु हुने छ । 

पिएसजीले दोस्रो खेलमा रेनेसलाई पराजित गर्दै लिगमा लगातार जित निकाल्न चाहन्छ । तर, रेनेसमाथी जित निकाल्न पिएसजीलाई त्यती सजिलो भने छैन् । किनकी टोलीमा स्टार खेलाडी नभएपनि रेनेस अप्रत्यासित जित निकाल्न सक्ने क्लब मध्यको एक मानिन्छ । 

रेनेसले लिगको पहिलो खेलमा जित निकाल्दै सुखद सुरुवात गरेको छ । त्यसैले दोस्रो खेलमा पनि पिएसजीलाई रोक्दै आफ्नो अंक तालिकामा अंक थप्ने योजनामा छ । तर, रेनेसलाई घरेलु मैदानमा दर्शकको साथ भएपनि पिएसजीका युवा स्टार केलिएन एमबाप्पे, स्ट्राइकर एडिसन काभानी र एन्जल डि मारियालाई रोक्न मुस्किल पर्ने छ । 

उत्कृष्ट लयमा रहेका एमबाप्पे, काभानी र डि मारीयाले लिगको पहिलो खेलमा निमेसलाई पराजित गर्दा एक एक गोल गरेका थिए । यता ब्राजिलियन स्टार खेलाडी नेयमार भने टोलीमा रहने वा नरहने कुनै टुङ्गो छैन् । उनी यतिबेला पेरिस छोड्ने मनसाएमा छन् ।