काठमाडौँ- कास्की प्रहरीले व्यवसायिक आचरण विपरित काम गर्ने १० प्रहरीलाई कारबाही गरेको छ। साउन महिनामा गरेका सफल अनुसन्धान तथा कारबाही सार्वजनिक गदै कास्की प्रहरीले १० जना प्रहरीमाथि कारबाही गरिएको जनाएको छ ।
व्यवसायिक आचरण विपरित काम गर्ने १ जनालाई निस्कासन गरिएको छ। तीन जनाको ग्रेड घटुवा गरिएको छ भने ३ जनालाई नसिहत तथा ३ जनालाई चेतावनी दिएको छ।
गत साउन महिनामा उत्कृष्ट काम गर्ने १५ जनालाई कास्की प्रहरीले पुरस्कृत गरेको थियो। १२ जना प्रहरी जवान २ जान सहायक प्रहरी निरीक्षक तथा एक जना प्रहरी निरीक्षक पुरस्कृत भएको कास्की प्रहरीले जनाएको छ।
पोखरा सबैभन्दा बढी लागूऔषध प्रयोग हुने सहर हो। लागूऔषध कारोबार तथा अवैध क्रियाकलाप बढेपछि आइजीपी सर्वेन्द्र खनालले एसपी दानबहादुर कार्कीलाई पोखरा प्रहरीको प्रमुखमा पठाएका थिए।
आइजीपी खनाल नियुक्त भएसँगै सचिवालयको जिम्मेवारी पाएका एसपी कार्की अब्बल प्रहरी अधिकारीको रुपमा चिनिन्छन्।
कास्की प्रहरीको जिम्मेवारी पाएसँगै कार्कीले पर्यटकीय क्षेत्र पोखरालाई लागू औषध प्रयोग, कारोबार, अवैध क्रियाकलाप तथा चोरी नियन्त्रण गर्ने उद्देश्यले आफ्नो सक्रियता बढाएका छन्।
प्रकाशित: Dec 31, 2017| 18:23 आइतबार, पुस १६, २०७४