लिभरपुललाई सिजनको पहिलो उपाधि

एजेन्सी- युइएफए च्याम्पियन्स लिग विजेता लिभरपुलले चेल्सीलई हराउँदै सुपर कपको उपाधि जितेको छ। बुधबार राती भएको खेलमा चेल्सीलाई पेनाल्टी सुटआउटमा ५-४ ले पराजित गर्दै सिजनको पहिलो उपाधि जितेको हो । 

निर्धारित समयको खेलमा दुबै टोलीले २-२ को बराबरी खेलेपछि खेलको निर्णय पेनाल्टी सुटआउटमा पुगेको थियो । पेनाल्टीमा भने चेल्सी ५-४ ले पराजित भएको हो । यसअघि निर्धारित समयको खेलमा लिभरपुलका लागि साडियो मानेले दुई गोल गरेका थिए । 

त्यस्तै चेल्सीका लागि ओलिभर जिराउड र जोर्गिन्होले एक एक गोल गरे । खेलका सुरुवाती अग्रता भने चेल्सीले लिएको थियो । खेलको ३६ औं मिनेटमा ओलिभर जिराउडले गोल गर्दै चेल्सीलाई पहिलो हाफमा १-० को अग्रता दिलाएका थिए । 

४८ औं मिनेटमा साडियो मानेले गोल गर्दै खेल १-१ को बराबरीमा ल्याएका थिए । त्यस्तै ९५ औं मिनेटमा मानेले व्यक्तिगत दोस्रो गोल गर्दै लिभरपुललाई २-१ को अग्रता दिलाउँदा १०१ औं मिनेटमा जोर्गिन्होले पेनाल्टीमा गोल गर्दै खेल २-२ को बराबरीमा ल्याएका थिए । 

तर, पेनाल्टी सुटआउटमा लिभरपुलका गोलरक्षक एड्रियनले टमी अब्राहमको पेनाल्टी रोकेपछि लिभरपुलले सिजनको पहिलो उपाधि उचालेको हो । यि दुबै टोली युरोपा लिग र च्याम्पियन्स लिगको विजेताको हैसियतले सुपर कपमा भिडेका हुन्।