काठमाडौं - नेपाल विद्युत प्राधिकरणले गत आर्थिक वर्षमा ७ अर्ब २० करोड रुपैयाँ नाफा गरेको छ। यो नाफा अघिल्लो वर्षको भन्दा १४९ प्रतिशत बढी हो। आर्थिक वर्ष २०७५/७६ मा ७ अर्ब २० करोड नाफा भएको थियो भने आर्थिक वर्ष २०७४/७५ मा साढे २ अर्ब मात्र नाफा भएको थियो।
सिंहदरबारमा मंगलबार भएको पत्रकार सम्मेलनमा ऊर्जा जलश्रोत तथा सिँचाइ मन्त्री वर्षमान पुनले गत आर्थिक वर्षमा प्राधिकरणले गरेको प्रगति समीक्षाका बारेमा जानकारी दिँदै ७ अर्ब २० करोड नाफा भएको बताए।
यस्तै विद्युत चुहावट नियन्त्रणमा पनि प्राधिकरणले प्रगति हात पारेको छ। चुहावट १५ दशमलव ३२ प्रतिशत मा झरेको छ। यो अघिल्लो वर्ष भन्दा ५ दशमलव १३ प्रतिशतले कम हो। आव २०७४/७५ मा चुहावट २० दशमलव ४५ प्रतिशत रहेको थियो।
यस्तै ब्याज र रोयल्टी गरी गएको आर्थिक वर्षमा प्राधिकरणले १५ अर्ब ५९ करोड रुपैयाँ राष्ट्रिय ढुकुटीमा जम्मा गरेको छ।
गत आर्थिक वर्षमा ७ अर्ब ५५ करोड युनिट बिजुली खपत भएको छ। जसमा नेपाल विद्युत प्राधिकरणको उत्पादन २ अर्ब ५५ करोड, निजी क्षेत्रको उत्पादनबाट २ अर्ब १९ करोड र भारतबाट २ अर्ब ८१ करोड किलोवाट आवर युनिट विद्युत आयात गरिएको छ। अहिलेसम्म ७८% अर्थात ४५ लाख नागरिकको घरमा बिजुली पुगेको छ। यो संख्या गत वर्ष भन्दा १०% बढी हो।
प्रकाशित: Dec 31, 2017| 18:23 आइतबार, पुस १६, २०७४