काठमाडौं - धादिङको बेनीघाटरोराङ गाउँपालिका–३ सलाङघाटमा भएको बस दुर्घटनामा परी मृत्यु हुनेको सङ्ख्या ९ पुगेको छ । मृतकमध्ये पाँच जनाको सनाखत भएको छ। दुर्घटनामा ज्यान गुमाएका अन्यको सनाखत हुन सकेको छैन। आफन्तहरु आउने क्रम जारी रहेकाेले शव पहिचानमा सहजता हुने प्रहरीले जनाएको छ।
शुक्रबार बिहान सर्लाहीको मङ्लगवाबाट काठमाडौँतर्फ आउँदै गरेको ना६ख ७४६९ नं बस सडकबाट १०० मिटर तल त्रिशूली नदीमा खसेको थियो । प्रहरी उपरीक्षक राजकुमाव वैदवारका अनुसार दुर्घटनामा तीन जनाको घटनास्थलमा र दुई जनाको चितवनको मुग्लिङ क्षेत्रमा शव भेटिएको थियो। यसैगरी कृष्णभिरमा एक पुरुषको शव तथा चितवनको देवघाटमा दुई महिलाको शव भेटिएको थियो। मृत्यु हुनेमा ३५ वर्षीय अजय दास र २५ वर्षीय विजय कुर्मी, कण्डक्टर ऋषि उप्रेती, मलंगवा १ निवासी ४० वर्षीय सुनिलकुमार श्रीवास्तव र उनकी श्रीमती ३५ वर्षीय नीमा रहेका छन्। अन्यको भने पहिचान खुल्न बाँकी रहेको प्रहरीले जानकारी दिएको छ। शनिबार बिहानै देखि गोताखोरको प्रयोग गरि पुन: बेपत्ताहरुको खोजि कार्य जारी रहेको वैदवारले जानकारी दिए।
कृष्ण यातायातको बस अत्यधिक गतिका साथ सलाङस्थित वन क्षेत्रको मोडबाट त्रिशूलीमा खसेको थियो। दुर्घटनामा घाइते १६ जनाको ट्रमा सेन्टर काठमाडौंमा र बाँकीको अन्य अस्पतालमा उपचार भइरहेको छ। बसमा करिब ४५ यात्रु रहेको बताइएको छ। अझै २० भन्दा बढी यात्रु बेपत्ता छन्। घटनाको कारणबारे अनुसन्धान भइरहेको प्रहरीले जनाएको छ।
प्रकाशित: Dec 31, 2017| 18:23 आइतबार, पुस १६, २०७४