भारतको कश्मीरमा सुरक्षासम्बन्धी चेतावनी जारी गरिएपछि लाखौं तीर्थयात्री र पर्यटकहरुले कश्मीर छोडिरहेका छन् । स्थानीयमा त्रासको माहोल रहेको अन्तर्राष्ट्रिय सञ्चारमाध्यमहरुले उल्लेख गरेका छन् ।
सरकारले सुरक्षा चेतावनी जारी गरेपछि स्थानीयहरुमा दौडधुप मच्चिएको र उनीहरुले एक–दुई महिनासम्म बन्दको जस्तो अवस्था आउनसक्ने अनुमान लगाउँदै दैनिक उपभोग्य वस्तु सञ्चय गर्न थालेको बीबीसी हिन्दीले उल्लेख गरेको छ ।
अहिले कश्मीरबाट लाखौं मजदुर, पर्यटक र तीर्थयात्रीहरु बाहिरिन थालेको बेलायतबाट प्रकाशन हुने द गार्जियनले उल्लेख गरेको छ ।
भारत सरकारले अमरनाथ तीर्थयात्रामा गएका यात्रीमाथि आतंकवादी आक्रमण हुनसक्ने भन्दै सबै तीर्थयात्री र पर्यटकहरुलाई कश्मीर छोड्न आग्रह गरेको छ । बेलायत, जर्मनी, अष्ट्रेलिया लगायतका देशहरुले पनि आफ्ना नागरिकलाई कश्मीर नजान वा त्यहाँबाट फर्कन आग्रह गरेका छन् ।
अहिले पसलहरुमा स्थानीयको भीड लागेको, मानिसहरुले दैनिक उपभोग्य वस्तु, औषधी र इन्धन सञ्चय गर्न थालेको, पेट्रोल पम्पमा पनि लामो लाइन लागेको गार्जियनले उल्लेख गरेको छ । बैंकका एटिएममा समेत नगद मौज्दात रित्तिएको छ भने कश्मीर छोड्ने मानिसहरुको भीडले विमानस्थल अस्तव्यस्त बनेको छ ।
इन्डिया टूडेका अनुसार कश्मीरमा अनिश्चितताको माहोल बनेको छ । सडकमा सुरक्षाकर्मीको भीड छ । बीबीसीका अनुसार सन् १९९९ मा भारत र पाकिस्तानबीच भएको कारगिल युद्धका बेला पनि यस्तो अवस्था थिएन ।
जम्मुकी पत्रकार अनुराधा भसीनले कश्मीरमा सन् १९९० को हिंसाका बेलापछि यस्तो अवस्था नदेखिएको बताएकी छन् । उनका अनुसार विगत २० वर्षदेखि नरोकिएको अमरनाथ यात्रा रोकिंदा पनि यस्तो अवस्था आएको हो ।
कश्मीरको उच्च हिमाली क्षेत्रमा रहेको हिन्दू तीर्थ अमरनाथमा हरेक वर्ष ४५ दिने तीर्थयात्रा हुन्छ ।
अमरनाथका तीर्थयात्रीमाथि 'पाकिस्तान संरक्षित' आतंकवादीबाट आक्रमण हुनसक्ने भन्दै स्थानीय प्रशासनले सुरक्षा सम्बन्धी चेतावनी जारी गरेको हो । सशस्त्र विद्रोहीहरुले यसअघि पनि हिन्दू तीर्थयात्रीलाई निसाना बनाएका थिए ।
सन् १९४७ मा भारत विभाजन भएपछि पाकिस्तान र भारतबीच चार पटक युद्ध भइसकेको छ । अहिले पनि कश्मीरको विषयलाई लिएर दुबै देशबीच द्वन्द्व छ ।