गुल्मीमा फेरि पहिरोले घर बगायो : १ जनाको मृत्यु 

गुल्मी- गुल्मीमा फेरि पहिरो गएको छ । कालीगण्डकी गाउँपालिका–७ छापचौरमा शनिबार राति पहिरोले घर बगाउँदा एकजनाको मृत्यु भएको छ । 

शनिबार रातिको वर्षाले छापचौरका विष्णु परियारको घर पहिरोले बगाउँदा १३ वर्षीय चुन्ने परियारको मृत्यु भएको हो । पहिरोले पुरिएर सोही परिवारका पाँच घाइते भएका छन् ।

अन्य केहि व्यक्ति हराइरहेको हुनसक्ने आशंका गरिएको छ । उनीहरुको खोजीका लागि पुर्तिघाट र भुर्तुङ प्रहरी चौकीबाट प्रहरी टोली परिचालन गरिएको जिल्ला प्रहरी प्रमुख एसपी दिपककुमार बस्नेतले जानकारी दिए । 

गत साता गुल्मीको सत्यवती गाउँपालिकामा भीषण पहिरो जादा ११ जनाको मृत्यु भएको थियो । वडा नं ४ लिम्घामा ३ घर बग्दा ८ जनाले मृत्यु भएको थियो भने गाउँपालिकाको वडा नम्बर ३ मा ३ जनाको ज्यान गएको थियो ।