काठमाडौँ- मेलम्चीको पानी अझै डेढ वर्ष काठमाडौं उपत्यका नआउने भएको छ । काम सुरु भएको ३१ वर्ष हुँदा पनि राजनीतिक चलखेलका कारण मेलम्चीको पानी आउन अझै डेढ वर्ष भन्दा बढि समय लाग्ने देखिएको हो ।
इटाली कम्पनी सिएमसीलाई कमिसनमा कुरा नमिलेपछि स्वयम खानेपानी मन्त्रालयका अधिकारीहरुले घर फर्किन बाध्य पारेका थिए । उसले काम करिब अन्तिम चरणमा पुर्याएको थियो । २०७५ माघ महिनामै पानी काठमाडौं झार्ने लक्ष्यका साथ काम भइरहेको उसले जनाएको थियो ।
तर, केहि नेता र कर्मचारीको खेलका कारण सिमएसी टाट पल्टिएको भन्दै काम छाड्न बाध्य पारिएको थियो । उसले काम छाडेपछि अहिले पुनः नयाँ टेन्डर खोलिएको छ ।
गत जेठ ६ गते मन्त्रिपरिषद् बैठकले मेलम्ची खानेपानी आयोजनाको आवश्यक निर्माण कार्य गर्न मेलम्ची खानेपानी विकास समितिलाई निर्देशन दिएपछि आयोजनाले निर्माणको बाँकी काम गर्न गएको जेठ १७ गते बोलपत्र गरेको छ । सुरुङ निर्माणका लागि दुई र हेडबक्स निर्माणका लागि दुईवटा कम्पनीले बोलपत्र दर्ता गराएका थिए ।
तीमध्ये एउटा चिनियाँ कम्पनीको बोलपत्र छ । सबै बोलपत्रको प्राविधिक मूल्याङ्कन गरी स्वीकृतिका लागि एसियाली विकास बैङ्क (एडीबी)मा पठाइएको जानकारी समितिका कार्यकारी निर्देशक सूर्यराज कँडेलले दिए । एडीबी आयोजनाको प्रमुख लगानीकर्ता हो । कार्यकारी निर्देशक कँडेलका अनुसार आउने २०७७ असार मसान्तसम्म अधिकांश काम सक्ने योजना छ ।
राजधानीलाई पिउने पानी उपलब्ध गराउने सपना बोकेको मेलम्चीको बाँकी कामको लागत दुई अर्ब ५० करोड रुपियाँ अनुमान गरिएको छ । सरकारले मेलम्चीका लागि तीन अर्ब रुपियाँ तथा याङ्री र लार्के परियोजनाका लागि थप तीन अर्ब रुपियाँ गरी छ अर्ब रुपियाँ बजेट विनियोजन गरेको छ ।
मेलम्चीको पानीले मात्रै राजधानीवासीको माग पूरा गर्न नसक्ने भएकाले सरकारको दीर्घकालीन सोचअनुसार याङ्री र लार्के खोलाको पानी पनि मेलम्चीमा ल्याउने योजना छ ।
तीन दसकअघि पञ्चायत ढलेसँगै अन्तरिम सरकारका प्रधानमन्त्री कृष्णप्रसाद भट्टराईले मेलम्चीको पानी ल्याएर जनतालाई खानेपानीका साथै सडक पखाल्ने आश्वासन दिएका थिए । त्यसपछिका हरेक सरकारको उच्च प्राथमिकतामा रहँदै आए पनि मेलम्ची भने परपर सर्दै गइरहेको छ ।
प्रकाशित: Dec 31, 2017| 18:23 आइतबार, पुस १६, २०७४