पार्टी विभाजनबाट एमालेलाई क्षति पुग्न नदिन राजीनामा : राई

विराटनगर– प्रदेश १ का निवर्तमान मुख्यमन्त्री शेरधन राईले पार्टी विभाजनबाट नेकपा एमालेलाई क्षति पुग्न नदिन पदबाट राजीनामा दिएको बताएका छन् ।

देशमा संघीयता लागु भएपछि पाँच वर्षे कार्यकालको लागि पहिलो मुख्यमन्त्रीमा निर्वाचित भए पनि देशको विकसित राजनीतिक परिस्थिती, पार्टीभित्र देखा परेको बिग्रह, टुटफुट त्यसको प्रभाव र असरबाट प्रदेश नं १ मा नेकपा एमालेलाई क्षति पुग्न नदिन, सरकारको स्थायित्वलाई सुनिश्चित गर्न, देशकै ठूलो दल नेपालको कम्युनिष्ट आन्दोलनको मूलधारलाई कमजोर हुन नदिन राजीनामा दिएको उनले तर्क गरे।

पार्टी नेतृत्वको विश्वास, साथ र सर्मथन अनि आफूले  नेतृत्व गरेको दलमा पूर्ण बहुमत रहँदा रहँदै पनि प्रदेशमा अराजकता र अस्थिरता पैदा नहोस्, पार्टी एकताको पक्ष मजबुत होस्, पार्टीभित्र उत्पन्न समस्याको ठोस समाधानका लागि कार्यन्वयनमा ल्याइएको १० बुँदे सहमतिलाई अक्षरशः पालना गर्न र गराउनको लागि पद त्यागको निश्कर्षमा पुगेको निवर्तमान मुख्यमन्त्री राईको भनाइ छ। आफ्नो प्रस्तावमा नेता आचार्यलाई दोश्रो मुख्यमन्त्रीमा चयन गरिएको उनले बताए ।