मंगलबार, कात्तिक २६, २०७६

समाचार

कीर्ते गरेर साढे चार करोड ठगेकाे आरोपमा ६ पक्राउ

कीर्ते गरेर साढे चार करोड ठगेकाे आरोपमा ६ पक्राउ

झापा- नक्कली कागजात बनाएर साढे चार करोडभन्दा बढी रूपैयाँ ठगेकाे आरोपमा प्रहरीले ६ जनालाई पक्राउ गरेको छ।

पक्राउ पर्नेमा सुनसरी, इटहरीका एभरेस्ट कन्सल्टेन्सीका इञ्जिनियर भेषराज खत्री, मोरङ, बेलबारी-३ का इञ्जिनियर कर्ण चामलिङ, मकवानपुर, हेटौंडा-४ घर भई काठमाडौं-३१, नयाँ बानेश्वरमा बस्दै आएका सुरेन्द्र श्रेष्ठ, काठमाडौं-३, महराजगञ्ज चक्रपथका भुपेन्द्र श्रेष्ठ, चितवन, भण्डारा-९ घर भई काठमाडौं, नयाँ बानेश्वरमा बस्दै आएका ऋषिश्वर थपलिया, उदयपुर, गाईघाट घर बताउने काठमाडौं-७, चावहिलमा बस्दै आएका कृष्ण कार्की छन्। 

उनीहरूले काठमाडौं-३१ का सुरेन्द्र श्रेष्ठले सञ्चालन गरेको स्वर्णिम एण्ड श्रीजन कम्पनीका लागि बैंकबाट चार करोड ६० लाख रूपैयाँ कर्जा निकालेको जिल्ला प्रहरी कार्यालय, झापाका प्रवक्ता महेन्द्रकुमार श्रेष्ठले जानकारी दिए।

“बैंकिङ कसुर र सरकारी छाप कीर्ते गरी नक्कली कागजात तयार गरेको आरोपमा उनीहरूलाई पक्राउ गरिएको हो,” उनले भने, “राजमार्गसँगै जोडिएको जग्गाको नक्कली नक्सा बनाएर खोलाको बगर धितो राखेको पाइयो।”

उनीहरुले झापा कनकाई-९ स्थित कित्ता नं ३५९६ को ०-२-१० बिघा र कित्ता नं ३२७१ को ०-२-० बिघाको जग्गाको कीर्ते नक्सा तयार गरी खोला बगरको जग्गालाई राजमार्गमा जोडिएको जग्गा देखाएर ठगी गरेको प्रवक्ता श्रेष्ठले बताए।

उनीहरूविरुद्ध गत असोज ६ गते जिल्ला प्रहरी कार्यालय, झापामा उजुरी दर्ता भएको थियो। घटनाबारे अनुसन्धान भइरहेको प्रहरीले जनाएको छ ।

रासस

प्रतिक्रिया दिनुहोस्