पूर्वराजाको सम्पत्तिमा यती एयरको हालीमुहाली

काठमाडौं- राजधानीबाट प्रकाशित शुक्रबारका राष्ट्रिय दैनिक अखबारहरुले विविध विषयका खबरलाई प्राथमिकतामा पारेका छन् ।
 
आजको नयाँ पत्रिकाले पूर्वराजाको सम्पितमा यती एयरले हालिमुहाली गरेको विषयलाई मुख्य समाचार बनाएको छ । यती एयरलाइन्सकै कारण नेपाल ट्रस्टको केन्द्रीय कार्यालय नै विस्थापित भएको छ ।
 
नारायणहिटीको ठीक अगाडी दरबारमार्गमा रहेको नेपाल ट्रस्ट केन्द्रीय कार्यालय नै यती एयरलाइन्सको भगिनी संस्था थामसेर्कु ट्रेकिङ प्रालीले ३० वर्षका लागि लिजमा पाएको छ ।

दरबारमार्ग जस्तो प्राइम लोकसनमा रहेको एक रोपनी १४ आना जग्गाबाट ट्रस्टले मासिक भाडा जम्मा ४ लाख १६ हजार ६ सय रुपैयाँ मात्रै पाउने गरेको समाचारमा उल्लेख छ ।

यस्तै ट्रस्टको २ हजार ९ सय ७१ रोपनी जग्गा गोकर्ण रिसोर्ट र गल्फ कोर्सका लागि मासिक प्रतिरोपानी जम्मा ७ सय ४६ रुपैयाँ भाडामा दिइएको छ ।

ट्रस्टसँग २१ हजार ५ सय ६२ रोपानी जग्गा र घरहरु छन् तर आम्दानी भने जम्मा मासिक ८२ लाख मात्रै रहेको समचारमा जनाइएको छ ।

यस्तै नयाँ पत्रिकाले आँगनको फूल टिपेको निहुँमा घोराही उपमहानगरपालिका–४ का वडाध्यक्ष भीमबहादुर सार्कीले छिमेकी नौ वर्षीय बालकलाई कानको जाली फुट्ने गरी पिटेको विषयलाई पनि महत्वका साथ छापेको छ ।

बुधबार गाउँमा साउने संक्रान्तिको लुतो फाल्ने कार्यक्रम चल्दै गर्दा अन्य केटाकेटीसँगै खेल्दै हिँडेका भरत घर्तीलाई वडाध्यक्ष सार्कीले कुटेका हुन् । वडाध्यक्ष सार्कीले पनि भरतलाई कुटेको स्विकारेको समाचारमा उल्लेख छ ।

धनगढीमा भएको विस्फोटको खबरलाई पनि नयाँ पत्रिकाले महत्वका साथ छापेको छ । यसै विषयलाई कान्तिपुर दैनिकले मुख्य समाचार बनाएको छ । चन्द कार्यकर्ताले बोकेको बम विस्फोट शीर्षकमा उसले खबर लेखेको छ ।

धनगढीको सहिद गेटनजिक रहेको निलम होटलमा बिहीबार साँझ विस्फोट हुँदा ५ जना घाइते भएका छन् भने २ जनाको अवस्था गम्भीर छ । होटलमा चिया पिउने क्रममा विप्लवका कायकर्ताले बोकेको बम पड्किएको प्रहरीले जनाएको छ ।
 
झोला भित्र टिफिनमा बम बोकेर हिडेको अवस्थामा बम कन्टेनरमा च्यापिदा विस्फोट भएको प्रहरीको अनुमान छ । विस्फोटमा परेर होटल सञ्चालक केशवराज पाण्डे, बझाङ घर भएका रामबहादुर सिंह जितेन्द्र यादव, मोविन खान र लक्ष्मण सेरेला घाइते भएका  छन् । सिंह र सेरालीको अवस्था गम्भीर रहेको समाचारमा जनाइएको छ । 

यस्तै कान्तिपुरले जग्गा सरकारी, दर्ता निजी, मोही वाग्मती खोलो शीर्षकको खबरलाई पनि प्राथमिकताका साथ छापेको छ।
 
काठमाडौंको सिनामंगलमा रहेको ४३ रोपनी ५ आना ३ पैसा सरकारी जग्गा व्यक्तिका नाममा रहेको पाइएको छ । काठमाडौं मेडिकल कलेज अघिल्तिर पर्ने साबिक कित्ता नं. ३६५ को उक्त जग्गाको विवरण मालपोत कार्यालय डिल्लीबजारको ढड्डाबाट भने गायब पारिएको समाचारमा जनाइएको छ ।
 
सिनामंगलको फाँटमा वाग्मती खोला पसेपछि गुठी संस्थानले २०४४ माघ ५ गते त्यसको ४३ रोपनी ५ आना ३ पैसा जग्गा सरकारका नाममा दर्ता गर्ने निर्णय गरेको थियो । त्यसलाई विभिन्न मुद्दा मामिला गरेर नारायणप्रसाद लामिछानेले कब्जामा लिएका थिए ।

सर्वोच्च अदालतले ९ वर्षअघि अन्तिम फैसला गर्दै जग्गा सरकारकै नाममा दर्ता गर्न आदेश दिएको थियो । सर्वोच्चको आदेश कार्यान्वयन नगरिँदा त्यस ठाउँमा अहिले व्यक्तिगत घरैघर रहेको समाचारमा उल्लेख छ ।

आजको अन्नपूर्ण पोस्ट्ले भने गण्डकीमा पर्यटक बढेको, धनगढी विस्फोटको र पूर्वमन्त्री एवम् कांग्रेस नेता मोहन बस्नेतको स्रोत नखुलेको ६१ करोड रुपैयाँ सहकारीमा भेटिएको खबरलाई पहिलो पृष्ठमा छापेको छ।