बुधबार, कात्तिक २७, २०७६

समाचार

कर्णालीको आक्रोश : हाम्रो भाग काठमाडौंले खोस्यो

कर्णालीको आक्रोश : हाम्रो भाग काठमाडौंले खोस्यो

सुर्खेत- सरकारले नियुक्ति गरेका सातै प्रदेश प्रमुखले मंगलबार शपथ लिएका छन्। तर, प्रदेश प्रमुखमा कर्णालीबाट कुनै पनि व्यक्ति अटाउन सकेनन्। प्रदेश प्रमुखहरुको सिफासिरदेखि नै कर्णालीबाट कुनै पनि व्यक्ति प्रदेश प्रमुखमा नियुक्त नभएपछि कर्णालीवासीले चर्को असन्तुष्टि र आक्रोस पोखेका हुन्।

नागरिकको आन्दोलनको बलमा जन्मिएको कर्णाली प्रदेशको प्रमुखबाट प्रदेश प्रमुख नपरेपछि कठमाडौंले कर्णालीको भाग खोसेको आरोप सामाजिक सञ्जालमा पोखिएको छ।

प्रदेश प्रमुखमा अन्य सबै प्रदेशको प्रतिनिधित्व भए पनि कर्णाली भने वञ्चित भयो।

कर्णालीलाई केन्द्रले हेपेको भन्दै सामाजिक संजालमा सर्वसाधारणले कर्णालीबाट प्रदेश प्रमुखमा प्रतिनिधित्व नहुनु हेपाहा प्रवृत्ति भएको गुनासो गरेका छन्।

कतिपयले कर्णालीलाई राज्यले फेरि पनि हेपेको प्रतिक्रिया दिएका छन् भने धेरैले सत्तापक्षकै नेताहरुको केन्द्रमा पहुँच पुग्न नसकेको धारणा व्यक्त गरेका छन्।

नेकपाकै केन्द्रीय नेतादेखि सर्वसाधारणसम्मले प्रदेश प्रमुख सिफारिसमा सरकारले कर्णालीलाई अन्याय गरेको जनाएका छन्।

नेकपाको विदेश विभाग उपप्रमुख रहेका विष्णु रिजालले सात जना प्रदेश प्रमुख नियुक्त गर्दा कर्णालीलाई छुट्याएको भन्दै असन्तुष्टि जनाए। ‘सात वटा प्रदेश प्रमुख नियुक्त गर्दा कर्णालीलाई छुटाएकोमा आश्चर्य लागेको छ’, उनले भनेका छन्।

कालिकोटका पत्रकार विष्णुप्रसाद न्यौपानेले कर्णालीले प्रदेश प्रमुखको नेतृत्व नपाउनुलाई नेकपाकाका नेताहरु जनार्दन शर्मा, शक्तिबहादुर बस्नेत र यामलाल कँडेलको राजनीतिक असफलता भएका बताए।

सुर्खेतका पत्रकार कलेन्द्र सेजुवालले कर्णालीको भाग काठमाडौंले खोसेको आरोप लगाए।

सामाजिक सञ्जालमा कर्णालीको आक्रोस पोखिएपछि सत्तारुढ दल नेकपा कर्णाली प्रदेशका अध्यक्ष गोरख बोगटी र नेपाली कांग्रेसका केन्द्रीय सदस्य जीवनबहादुर शाहीसँग लिइएको संक्षिप्त प्रतिक्रिया :

कम्युनिस्टले कर्णालीलाई हेप्यो : शाही

हामी सरकारमा हुँदा जुनसुकै व्यक्ति ल्याए पनि कर्णालीकै हुनुपर्ने अडान राखेका थियौं।

कर्णालीकै व्यक्तिलाई प्रदेश प्रमुख पनि बनायौं। तर प्रदेशदेखि केन्द्रसम्म दुई तिहाइको सरकार र शक्ति छ भन्ने क्रान्तिकारी साथीहरुले कर्णालीबाट प्रदेश प्रमुख बनाउन सकेनन्।

यो नितान्त पार्टीले गरेको नियुक्ति भएका कारण पनि कर्णालीलाई कुन पार्टीले कसरी हेरेको रहेछ भन्ने प्रमाणित भयो । वर्तमान सरकारले त कर्णालीलाई अन्याय नै गरेको छ।

यो सरकारले कर्णालीलाई कमजोर ठान्यो। के कर्णालीमा प्रदेश प्रमुख हुन लायक कुनै व्यक्ति छैनन् ?

यो त सबैको प्रतिनिधित्व गर्छाैं भन्ने कम्युनिस्टले कर्णालीलाई हेपेको गतिलो प्रमाण हो।

केन्द्रले एकलौटी गर्यो : बोगटी

कर्णालीमा प्रदेश प्रमुखका लागि उपयुक्त व्यक्ति धेरै थिए। तर सरकार र पार्टीको केन्द्रीय नेतृत्वले पार्टीको प्रदेश कमिटीसँग समन्व गरेन। केन्द्रले एक्लै निर्णय गर्दा कर्णालीबाट प्रदेश प्रमुखमा प्रतिनिधत्व हुन सकेन।

हामीले पार्टी केन्द्रसँग समन्वय गर्न खोजेकै थियौं। प्रदेश कमिटीभित्र पदाधिकारीका हिसाबले हामीले पनि केही समन्वय गर्नुपर्थ्यो।

केन्द्रमा हाम्रो पहुँच नभएको होइन, केही साथीहरुले लबिङ गरेकै थिए। तर अन्तिम निर्णय गर्दा कर्णाली फुत्कियो।

कम्तिमा कर्णालीबाट समेत एकजना मात्र प्रदेश प्रमुखमा प्रतिनिधित्व हुनुपथ्र्याे भन्ने हाम्रो मान्यता हो।

अझ कर्णालीमा कर्णालीकै व्यक्ति प्रदेश प्रमुख हुनुपर्दथ्यो।

प्रतिक्रिया दिनुहोस्