चिया खान रोकिएका १४ जवानको मृत्यु

काठमाडौं- भारतको हिमाचल प्रदेशको सोलनमा आइतबारदेखिको भारी वर्षाले चारवटा भवन भत्किँदा ठूलो संख्यामा सुरक्षाकर्मी मारिएका छन्।

दुर्घटनामा आइतबार ३ जनाको मृत्यु भएको थियो भने सोमबार ११ जनाको मृत्यु भएको अधिकारीहरुले जनाएका छन्।

मृत्यु हुनेमध्ये १३ जना असम राइफल्सका जवान रहेका छन्। सेना, सीआरपीएफ, हिमाचल पुलिस, एनडीआरएफलगायतले उद्धार गरिरहेका छन्।

अधिकारीहरुका अनुसार ३० जवान र १२ नागरिक भत्किएको भवनमा फसेका थिए। सबैलाई निकालिएको छ।

घर भत्किएपछि प्रहरीले घरधनीविरुद्ध एफआईआर दर्ता गराएको छ। मुख्यमन्त्री जयराम ठाकुरले घटनाको न्यायिक जाचबुझ गर्न आदेश दिएका छन्।

भवनमा रहेको एक ढावा पसलमा चिया खान रोकिएका असम राइफल्सका जवानहरु अचानक भवन भत्किँदा मारिएका हुन्।

उक्त समयमा असम राइफल्सका ३५ जवान थिए। तीमध्ये कतिपयको घाइते अवस्थामा उद्धार गरिएको छ।