धनगढी- अविरल वर्षाका कारण पहिरो खस्दा अछामको साँफे–मार्तडी सडकखण्ड अवरुद्ध भएको छ।
जिल्लाको चौरपाटी गाउँपालिका–६ मार्कुस्थित सडकमा पहिरो खस्दा साँफे-मार्तडी सडकखण्ड अवरुद्ध भएको हो।
सडक डिभिजन कार्यालयसँगको समन्वयमा प्रहरी चौकी चौखुट्टेको टोलीले पहिरो पन्छाउने काम गरिरहेको प्रदेश ट्राफिक प्रहरी कार्यालय अत्तरियाले जनाएको छ।
१६ घर पहिरोको उच्च जोखिममा
लगातारको अविरल बर्षाका कारण अछामको मेल्लेख गाउँपालिका–३ ठाँटीका १६ घर पहिरोको उच्च जोखिममा परेका छन्।
वडाको नौलाघर र चौसाल टोलको तलबाट पहिरो बग्न थालेपछि १६ घर जोखिमा परेका हुन्।
चौसाल टोलको सडक काटिएको ठाउँदेखि घर अगाडि र नौलाघर टोलमा घरको पछाडिबाट पहिरो जान थालेपछि नौलाघर टोलका स्थानीय नरेन्द्र नेपाली, जयबिर नेपाली र मानसिंह नेपालीको घर चर्केको छ।
यस्तै चौसाल टोलका जगत शाह, गोकुल शाह, भीमबहादुर शाह, देब शाह, भरत शाहलगायतको घर उच्च जोखिममा रहेको वडा अध्यक्ष केशरबहादुर शाहले बताए।