रसुवा- करिब ४ वर्षपछि खुलेको तातोपानी नाका पुनः बन्द भएको छ । सञ्चालनमा आएको दुई साता वित्न लाग्दासमेत अहिलेसम्म नाका सञ्चालन गरिएको दिन ल्याइएका ४ वटा कन्टेनरबाहेक कुनै पनि गाडी चलेका छैनन् ।
नेपालबाट गएका गाडीलाई चिनियाँ पक्षले प्रवेश दिएको छैन भने नेपालतर्फ पनि कुनै गाडी आएका छैनन् । बाटोकै कारण तत्काल सवारी चल्न नदिएको चिनियाँ पक्षको दाबी छ । बाटोको काम सकिन अझै समय लाग्ने भएकाले गाडी रोकिएको उसले बताएको छ ।
२०७२ को विनाशकारी भूकम्पले क्षति पुगेको अरनिको राजमार्गअन्तर्गत दोलालघाटदेखि कोदारीसम्मको ५९ किमी सडकको विभिन्न खण्डमा मर्मत तथा पहिरो रोकथामको काम अझै पूरा भएको छैन।
बाटो बनिनसक्दै गत जेठ १५ मा तातोपानी नाका पुनः संचालन गरिएको घोषणासहित उद्घाटन गरिएको थियो । ४९ महिनापछि निकै कसरतका साथ सञ्चालनमा आएको नाकामा चारवटा कन्टेनरलाई रातो कार्पेट ओछ्याएर स्वागत गरिएको थियो ।
जेठ १७ गतेबाट सञ्चालन गर्ने सहमति भए पनि २ दिनअघि नै नाका सञ्चालनमा आएको थियो। तर, अहिले फेरि नाका ठप्प भएको छ ।
प्रकाशित: Dec 31, 2017| 18:23 आइतबार, पुस १६, २०७४