काठमाडौं - सवारी ज्यान मुद्दामा घूस लिएर नक्कली चालक खडा गर्ने प्रहरी निरीक्षक पक्राउ परेका छन्। दस लाख रुपैयाँ घूस लिएर नक्कली चालक खडा गरी सवारी ज्यान मुद्दामा चालक नै परिवर्तन गरेको अभियोगमा इलाका प्रहरी कार्यालय गैंडाकोट नवलपुरका प्रहरी निरीक्षक लोबहादुर जिसी पक्राउ परेका हुन्।
घुस खाएर नक्कली चालक खडा गरेको उजुरी परेपछि अख्तियार दुरुपयोग अनुसन्धान आयोगले उनलाई नियन्त्रणमा लिएको हो। घूसकाण्डबारे अख्तियार दुरुपयोग अनुसन्धान आयोगमा बयान दिन पुगेका उनलाई अख्तियारको टंगालस्थित कार्यालयले पक्राउ गरेको हो। अख्तियारले उनलाई नियन्त्रणमा लिएर अनुसन्धान गरिरहेको बताएको छ।
अख्तियारकाअनुसार नवलपरासी गैंडाकोटमा गत वैशाख ११ गते भएको सवारी दुर्घटनामा बोधराज पाण्डेले चलाएको जिपले मोटरसाइकललाई ठक्कर दिँदा एकको मृत्यु र अर्का एक जना घाइते भएका थिए। जिसीले घुस लिएर पाण्डेको सट्टा किसुन महतोलाई चालक बनाएर मुद्दा अदालतमा लगेको थियो। पाण्डे परिवारले प्रहरी निरीक्षक जिसीलाई नक्कली पीडित बनाउन रकम दिएको उजुरी अख्तियारमा परेपछि उनलाई नियन्त्रणमा लिइएको हो।
प्रकाशित: Dec 31, 2017| 18:23 आइतबार, पुस १६, २०७४