नेकपाले आज कार्यविभाजनको टुङ्गो लगाउने

काठमाडौं- सत्तारुढ दल नेपाल कम्युनिष्ट पार्टी (नेकपा)ले बुधबार (आज) केन्द्रीय सदस्यहरुको कार्यविभाजनको टुङ्गो लगाउने भएको छ । मध्यान्न १२ बजेपछि बस्ने सचिवालय बैठकले हिजो मंगलबार मिलाउन नसकेको विषयमा थप छलफल गर्दै आज अन्तिम रुप दिने तयारी गरेको हो । 

प्रधानमन्त्री निवास बालुवाटारमा मंगलबार बसेको सचिवालय बैठकले बुधबार कार्यविभाजन टुङ्ग्याउने गरी छलफल शुरु गरेको पार्टीका प्रवक्ता नारायणकाजी श्रेष्ठले जानकारी दिए । आज केन्द्रीय सदस्यको कार्यविभाजन टुङ्ग्याएर विदेशस्थित प्रवास कमिटीलगायत साङ्गठनिक एकताका बाँकी कामको छलफलमा गरिने उनले बताए ।

हिजो बैठकमा ७७ वटै जिल्लाको इन्चार्ज र सहइन्चार्जको जिम्मेवारी केन्द्रिय सदस्यलाई दिन लागिएको विषमया अध्यक्ष केपी शर्मा ओली र माधव नेपालबीच विवाद भएको थियो । नेता नेपाल दाहोरो जिम्मेवारी दिनु हुन्न भन्ने पक्षमा छन् भने ओली दिनु पर्नेमा अडानमा देखिएका छन् । दुई नेताको अडानका कारण हिजो बैठक निष्कर्षविहिन भएको थियो । 

एकतापछि नेकपामा ४४१ केन्द्रीय सदस्य छन् । नेकपाको सचिवालय बैठक यही जेठ २ गतेपछि यता बस्न सकेको थिएन । यही जेठ ३ गते पार्टी एकीकरण भएको एक वर्ष पुगेको अवसरमा १९ वटा जनवर्गीय सङ्गठनको नाम, संयोजक र सहसंयोजक तोकेको थियो ।