काबुल विमानस्थलमा देश छोड्नेको भीड

काबुल (अफगानिस्तान)– काबुल विमानस्थल अव्यवस्थित भीड र भागदौडका कारण अझै पनि अस्तव्यस्त रहेको छ। विमानस्थलमा गत आइतबार मात्र पनि कम्तीमा सात जना अफगान नागरिकको मृत्यु भएको बेलायती रक्षा मन्त्रालयले जनाएको थियो। यति बेला  विमानस्थलमा देश छाड्ने अफगान र विदेशी नागरिकको ठूलो भीड लागेको छ।

सत्तामा तालिबान आएपछि एकै पटक हजारौँ मानिसले देश छोडेर भाग्ने प्रयास गर्दा विमानस्थल वरपर ठूलो भीड लाग्ने गरेको छ। गत हप्तादेखि काबुलको अन्तरराष्ट्रिय विमानस्थल निकै अव्यवस्थाबीच चलिरहेको बताइएको छ।

अगस्त १५ मा तालिबानले सत्ता कब्जामा लिएपछि संयुक्त राज्य अमेरिका र अफगानिस्तानको सहयोगी राष्ट्रले करिब एक हप्तादेखि सञ्चालनमा ल्याएको उद्धार उडानमा जान प्रयास गरिरहेका मानिसको ठूलो संख्याको सामना गर्न सङ्घर्ष गरिरहेका छन्। एएफपी