आर्मीले कर्णाली प्रदेशको सामना गर्दै

काठमाडौं- तेस्रो संस्करणको प्रधानमन्त्री कप एकदिवसीय क्रिकेट प्रतियोगितामा आज (मंगलबार) दुई खेल हुदैछ । समुह ‘ए’ अन्तर्गत प्रदेश ३ र गण्डकी प्रदेश तथा समुह ‘बी’ अन्तर्गत त्रिभुवन आर्मी क्लब र कर्णाली प्रदेशबीच प्रतिस्पर्धा हुन लागेको हो ।

कीर्तिपुरस्थित टियु मैदानमा गण्डकी प्रदेशले आफ्नो पहिलो खेलमा प्रदेश ३ को सामना गर्दै छ । प्रदेश ३ को भने यो तेस्रो खेल हो । पहिलो खेलमा एपिएफसँग गुमाएको प्रदेश ३ ले आफ्नो दोस्रो खेलमा प्रदेश ५ लाई पराजित गर्दै प्रतियोगितामा पहिलो जित निकालेको छ । 

त्यसैले प्रदेश ३ आफ्ना तस्रो खेलमा गण्डकी प्रदेशलाई पराजित गर्दै लगातार दोस्रो जित चाहन्छ । यता आफ्नो पहिलो खेलमा नै जित निकाल्दै गण्डकी प्रदेश प्रतियोगितामा सुखद सुरुवात गर्न चाहन्छ । प्रदेश ३ भने दुई खेलबाट २ अंक जोड्दै तालिकाको दोस्रो स्थानमा छ । गण्डकीको यो पहिलो खेल हो ।

त्यस्तै आजै हुने अर्को खेलमा मुलपानी क्रिकेट मैदानमा आर्मी र कर्णाली प्रदेश भिड्दै छन् । लगातार तीन जित निकाल्दै आर्मी अघिल्लो चरण पुग्ने योजनामा छ । आर्मीले पहिलो खेलमा प्रदेश २ र दोस्रो खेलमा प्रदेश १ लाई पराजित गर्दै प्रतियोगितामा लगातार दोस्रो जित निकालेको छ । आर्मी दुई खेलबाट ४ अंक सहित तालिकाको शीर्ष स्थानमा छ ।