काठमाडौं - प्रतिबन्धित नेकपाका महासचिव नेत्र विक्रम चन्द ‘विप्लव’ले काठमाडौं उपत्यकासहित विभिन्न स्थानमा भएको घटनाको दोषी प्रधानमन्त्री केपी शर्मा ओली (केपी) र नेकपाका अध्यक्ष पुष्प कमल दाहाल ‘प्रचण्ड’ भएको आरोप लगाएका छन्।
सोमबार साँझ विज्ञप्ति जारी गर्दै विप्लवले भनेका छन्,‘जेठ १२ गते काठमाडौँमा भएको विस्फोटमा पार्टी, जनमुक्ति सेना, जवसका कमान्डर कमरेड महान, कमरेड दीपेन्द्र, कमरेड प्रज्वलशाही, कमरेड निरन्तरको सहादतले यसप्रकारको घटना कसरी हुनपुग्यो, त्यसको सत्यतथ्य जनतामा ल्याउने प्रतिबद्धता व्यक्त गर्दछौँ। यी सबै घटना हुनुको मुख्य दोषी केपी सरकारको फासिवादी दमन नै रहेको स्पष्ट गर्दछौँ।’
सरकारको राज्यआतंक, तीर्थ घिमिरे हत्याकाण्ड विरुद्ध नेपाल बन्द गरिएको जानकारी दिँदै विज्ञप्तिमा भनिएको छ,‘केपी—पीके कम्पनीको सरकार गठन भएदेखि नै नेपाली जनता र राष्ट्रको मुक्तिकालागि गरिएका संघर्ष, आन्दोलनमा उत्रिएका पार्टी र जनतामाथि दमन गर्नु, हाम्रो पार्टीका नेता/कार्यकर्ता, शुभचिन्तकलाई गिरफ्तार गर्नु, यहाँसम्मकी दोहोरो मुठभेटका नाममा निःशस्त्र व्यक्तिमाथि गोली प्रहार गरी हत्याका घटनाहरू हुन थालेका छन्। साथै यो सरकारले राष्ट्रघात र जनघातमा पनि यसअघिका प्रतिक्रियावादी सरकारलाई उछिनिरहेको छ।’
पार्टी सहिदहरूको बलिदान खेर जाननदिने र एकीकृत जनक्रान्ति सफल गरिछाड्ने प्रतिबद्धता विप्लवले विज्ञप्तिमा उल्लेख गरेका छन्। मृतकहरुलाई विप्लवले सहिद घोषणा गरेको छ।
काठमाडौं उपत्यकामा आइतबार साँझ भएको विस्फोटमा चार जना मारिएका छन् भने सोमबार बन्दको समान्य प्रभाव परेको छ।