विप्लवका दर्जनबढी कार्यकर्ता पक्राउ

काठमाडौं – देशका विभिन्न क्षेत्रबाट नेत्र विक्रम चन्द विप्लव नेतृत्वको १३ कार्यकर्ता पक्राउ परेका छन्। हिजो र आज गरी कुल १३ कार्यकर्ता पक्राउ परेका नेपाल प्रहरीका केन्द्रीय प्रवक्ता डिआइजी विश्वराज पोखरेलले नेपाल समयलाई जानकारी दिए।

हिंसात्मक गतिविधिमा संलग्न भएको आरोपमा उनीहरुलाई पक्राउ गरिएको प्रहरीले बताएको छ। डिआइजी पोखरेलका अनुसार सोमबार विप्लव समूहले घोषणा गरेको बन्दका क्रममा भने देशभरबाट ६ जनालाई नियन्त्रणमा लिइएको छ। 

डिआइजी पोखरेलका अनुसार ललितपुरबाट चार जना, झापाबाट एक जना र रोल्पाबाट एकजना विप्लव कार्यकर्तालाई पक्राउ गरिएको छ। 

आइतबार विप्लव समूहले काठमाडौं उपत्यकाका विभिन्न क्षेत्रमा बम विष्फोट गराएपछि प्रहरीले सुरक्षा व्यवस्था कडा बनाएको थियो। सो घटनापछि सोमबारसम्ममा विप्लवका १३ जना कार्यकर्ता पक्राउ परिसकेका छन्। प्रहरीले आइतबार कोटेश्वर क्षेत्रबाट ७ जनालाई पक्राउ गरेको थियो। विप्लवको बन्दका क्रममा देशभर चार सवारीसाधनमा आगजनी गरिएको डिआइजी पोखरेले बताए।