धनगढी - बैतडीको दोगडाकेदार गाउँपालिका-३ श्रीकोटस्थित सनातन धर्म मावि नजिकै महाकाली राजमार्गमा रहेका आइडी बमहरु सेनाले निष्कृय पारेको छ। बैतडीस्थित नेपाली सेनाको हनुमानध्वज गुल्मको बम डिस्पोजल टोलीले निष्कृय पारेको हो।
हनुमानध्वज गुल्मका क्याप्टेन देवेन्द्र बस्नेत नेतृत्वको सेनाको टोलीले १ घण्टा लगाएर उक्त बमहरु पड्काएर डिस्पोज गरेको बैतडीका प्रहरी प्रवक्ता प्रहरी निरीक्षक रवीन्द्र चन्दले बताए। बिहान साढे ४ बजे फेला परेका उक्त बमहरु नेत्रविक्रम चन्द विप्लव समूहको नेपाल बन्दको आह्वान गरेको चन्द समूहले राखेको हुनसक्ने अनुमान गरिएको छ।
बम फेला परेको स्थानमा नेत्रविक्रम चन्द विप्लव समूहको युवा संगठनको नेपाल बन्द अपीलको पर्चा पनि भेटिएको हनुमानध्वज गुल्मका क्याप्टेन देवेन्द्र बस्नेत जानकारी दिए। विप्लव नेतृत्वको नेकपाले युवा संगठनका तीर्थराज घिमिरेलाई प्रहरीले गिरफ्तार गरी हत्या गरेको बिरोधमा नेपाल बन्दको घोषणा गरेको हो।
यस्तै कैलालीमा वडा कार्यालय अगाडि भेटिएको संकास्पद वस्तु नक्कली बम भएको पाइएको छ। भ्रम सृजना गर्न उक्त वस्तु राखिएको जिल्ला प्रहरी कार्यालय कैलालीले जनाएको छ। जिल्लाको गोदावरी नगरपालिका वडा नम्वर ६ को कार्यालय अगाडि बोरामा बेरिएको अवस्थामा शंकास्पद वस्तु फेला परेको देखेपछि सेनाको टोली डिस्पोजका लागि गएको थियो।
सेनाको टोली पुगेपछि उक्त वस्तु नक्कली भएको र त्रास सृजना गर्न मात्रै राखिएको पाइएको हो। बोरामा १० लिटरको ग्यालेनमा पेट्रोल मात्रै भेटिएको जिल्ला प्रहरी कार्यालय कैलालीका प्रहरी निरिक्षक प्रकाश डाँगीले बताए।
प्रकाशित: Dec 31, 2017| 18:23 आइतबार, पुस १६, २०७४