जनकपुरधाम – समाजवादी पार्टी नेपालका संघीय परिषद्का अध्यक्ष डा.बाबुराम भट्टराईले आफूलाई मधेशी जनताले नपत्याएको दुखेसो पोखेका छन्। मधेशसँग आफुले माया गरेपनि मधेशले पत्याउन नसकेको उनको भनाइ छ।
पार्टीले आइतबार जनकपुरमा आयोजना गरेको अभिमूखीकरण कार्यक्रममा बोल्दै डा.भट्टराईले भने, ‘मैले आफ्नो जीवनमा दुईपटक प्रेम गरेँ। एकबाट विश्वास पाएँ तर अर्कोले मलाई विश्वास गरेनन्।’ आफ्नो पहिलो प्रेम हिसिला यमी रहेको र दोस्रो प्रेम मधेससँग गरेको उनले बताए। पहिलो प्रेमबाट विश्वास पाएपनि दोस्रो प्रेम गरेको मधेशी जनताले आफूलाई पत्याउन नमानेको भट्टराईको दुखेसो थियो।
नेकपाका अध्यक्ष पुष्पकमल दहाल ‘प्रचण्ड’ ढुलमुले चरित्रको रहेको उनको आरोप छ। ‘प्रचण्डजी ढुलमुले चरित्र बोकेर हिँड्नु भएको छ,’ भट्टराईले भने, ‘उहाँको ढुलमुले चरित्रकै कारण माओवादी पार्टीमा एकमत हुन नसक्दा अधुरो संविधान जारी भयो।’ भट्टराईले संविधानलाई पूर्णता दिन राज्य पूनर्संरचनाको स्वरुप परिवर्तन गर्नुको विकल्प नरहेको दाबी गरे।
महिला र पुरुषको नागरिकतामा विभेद गर्ने नेपाल पहिलो राष्ट्र रहेको भन्दै उनले यस्तो विभेद कुनैपनि लोकतान्त्रिक संविधानमा नदेखिएको बताए।
प्रकाशित: Dec 31, 2017| 18:23 आइतबार, पुस १६, २०७४