तीन किलो यार्सागुम्बासहित दार्चुलाबाट एक जना पक्राउ

धनगढी- प्रहरीले दार्चुलाबाट तीन किलो यार्सागुम्बासहित एक जनालाई पक्राउ गरेको छ।

जिल्लाको ब्याँस गाउँपालिका–३ सिनाका २४ वर्षीय ग्रिस कुँवरलाई यार्सासहित पक्राउ गरिएको जिल्ला प्रहरी कार्यालय दार्चुलाका प्रहरी नायव उपरीक्षक मनोहरप्रसाद भट्टले बताए।

उनलाई दुहुँ गाउँपालिका-३ ब्रह्मदेव चोक पोष्टबाट नियन्त्रणमा लिएको प्रहरी नायव उपरीक्षक मनोहर प्रसाद भट्टले बताए। ‘चेक पोष्टमा चेकजाँच गर्दा फरकफरक प्लाष्टिकको झिल्लीभित्र तीन पोका यार्सा भेटियो’, प्रहरी नायव उपरीक्षक भट्टले भने, ‘आवश्यक कागज पत्र नभेटिएपछि नियन्त्रणमा लिइएको हो।’ 

आवश्यक कारबाहीका लागि यार्सासहित कुँवरलाई अपि नाम्पा संरक्षण क्षेत्र कार्यालय दार्चुला बुझाएको उनले बताए।