उपमेयरकै सामु वडा अध्यक्षले व्यापारी कुटे (भिडियो)

जनकपुरधाम – जनकपुरधाम उपमहानगरपालिकाका उपमेयरकै सामु एकजना वडाअध्यक्षले व्यापारीलाई कुट पिट गरेका छन्। उपमहानगरपालिकाकी उपमेयर रीता मिश्रकै सामु वडा नम्बर ७ का वडाअध्यक्ष जानकी राम साहले एकजना व्यवसायीलाई हातपात गरेको व्यवसायीहरुले आरोप लगाएका छन्।

उपमेयर मिश्रकै सामुन्ने वडाअध्यक्ष साहले जनक चोक र शिव चोकको बीचमा रहेको ग्रीन टेलरका सञ्चालक मो.असलमलाई हातपात गरेको स्थानीय व्यवसायीले बताएका छन्। फोहोरको विषयमा विवाद हुँदा वडाअध्यक्ष साहले हातपात गरेको बताइएको छ।

पसल अगाडी फोहोर किन गरेको भन्दै उपमेयर मिश्रले ग्रीन टेलरका सञ्चालक असलमलाई प्रश्न गरेकी थिइन्। असलमले ‘पसलको फोहोर मैले झोलामा जम्मा गरेको भन्दै सफाई कर्मचारीहरु हड्तलामा गएकोले सडकमा फोहोर थुप्रेको’ जबाफ फर्काएका थिए। यसै विषयमा विवाद हुँदा उपमेयरसँगै रहेका वडाअध्यक्ष साहले आफूमाथि हातपात गरेको ग्रीन टेलरका सञ्चालक असलमले बताएका छन्।

टेलर सञ्चालक असलममाथि कुटपिट भएको विरोधमा स्थानीय व्यवसायीहरुले उपमहानगरपालिका कार्यालय घेराउ गरेका छन्। व्यवसायीलाई हातपात गर्ने वडाअध्यक्ष र उपमेयरले माफी माग्नुपर्ने भन्दै उनीहरुले उपमहानगरपालिका कार्यालय परिसरभित्र नाराबाजी गरेका थिए।

तर, उपमेयर मिश्र बाहिर निस्केपछि आक्रोशित व्यवसायीहरु जबरजस्ती उनको कार्यकक्षतर्फ प्रवेश गर्न खोजेपछि त्यहाँ रहेका सफाई कर्मचारी, वडा सदस्य, कर्मचारी, सुरक्षार्थ खटेका प्रहरीलगायतका व्यक्तिहरु आफूहरुलाई उल्टै लखेटेको व्यवसायीहरुले बताएका छन्। वडा सदस्य तथा केहि कर्मचारीले कुटपिट गरेपछि एक व्यवसायी घाइते भएको र उपचारको लागि जनकपुर अञ्चल अस्पतालमा भर्ना गरिएको व्यवसायीहरुले बताएका छन्।

यता उपमेयर मिश्रले वडाअध्यक्ष साहले व्यवसायीलाई कुटपिट नगरी हातले धकेलेको मात्र दाबी गरेकी छिन्। ‘आन्दोलनरत सफाई कर्मचारीहरुको हड्ताल तोड्न लगाएर हामी फोहोरको उचित व्यवस्थापन गर्न पसल पसलमा भन्न निस्केका थियौं,’ उपमेयर मिश्रले भनिन्, ‘ग्रीन टेलर पुगेपछि उहाँ आक्रोशमा आएर कुरा गर्नु भयो। मसँगै रहेका वडाअध्यक्षले उहाँलाई सामान्य धक्कामात्र दिनु भएको थियो। कुटपिट चाँही गर्नुभएको होइन।’ राम्रो काम गर्न खोजेपनि उल्टो भएको उनको भनाई थियो।

जनप्रतिनितिले कुटपिट गरेको विरोधमा उपमहानगरपालिका वरिपरिका पसलहरु व्यवसायीहरुले केहिबेर बन्दसमेत गरेका थिए।